Titub 1 - Khoekhoegowab Elobmîs 2020

¹ Paulub, Elob di ǃgā tsî Jesub Xristub* di apostela* xu. Elob ǃkhōǂuibasen hâ khoena ta nî ǂgoms âna ǀgaiǀgaiǃnâ tsî ǁîb di ǃaoǃgâxasib ǃnâ ûis di amaba ǁkhāǁkhās ǃaroma.

² Nēs ǃnân ge ǀamo ûib di ǃâubasens a ama ǃkhaisa nî ǂanǁapo, ǃhūbaib di ǂnubihes aiǃâb ge tātsēs tsîna ǂhumi tama Eloba mîmâiba nîba.

³ Tsî Elob ge ǁîb di ǃGâiǂhôasa ǂhanu ǁaeb ai aoǁnâs ǃnâ ge ǂhaiǂhai, mâ khoe-i hoa-i ǃaroma. Elob sada ǃGâiǃōdī-aob ge ǁîb di mîmās ǀkha nē sîsenna ge ǂgomǃgâ te.

⁴ Titub, ǀgui ǂgoms ǃnâ ti ǂhunuma ǀgôab ǃoa ta ge ra xoa. Ab ǁGûb Elob tsî sada ǃGâiǃōdī-aob Jesub Xristuba ǀkhommi tsî ǂkhîb tsîna mā tsi.

Titub di sîsenni Kretas ǃnâ

⁵ Kretas ǃnâ ta ge ge ǁnāxū tsi, tsoatsoa khom ge sîsenna dītoa tsîts nî mâ ǃās hoas ǃnâ ǁgui-ai tsi ta ge khami mûǂamaoga mâise.

⁶ Mûǂamao-i ge ūo ûiba nî ūhâ tsî ǃgame ûib ǃnâ nî ǂgomǂgomsa tsî ǁî-i ôan ge nî ǂgomsabe tsî tā ǁnâuǀnamoǃnâ tsî ǁgauoǃnâ ûiba nî ūhâ.

⁷ Kerkheb di ǂgaeǂgui-ao-i ǃaroma i ge ǂhâbasa Elob di mûǂamao-i ase i nî ūose ûisa. Tā i ge nî ǁîǁâsen tsî ǃhae ǁaiba ūhâ; tā i ge nî ǀhorosema, ǃkhamao tsî mariǃgunuxa.

⁸ ǁÎ-i ge khoexasiba ǃhaokhoen ǃoa ūhâ tsî ǃgâin ǀguina nî ǀnam, ǃgāsa tsî i ge nî ǂhanu-ai. Eloǃaoǃgâxa tsî ǁkhaesenxa ûiba nî ūhâ.

⁹ Kerkheb ǂgaeǂgui-ao-i ge ǁkhāǁkhā-i ra ǂgomǂgomsa ǃGâiǂhôas ǃnâ ǀgaisase tsî ǁaposase nî ǂgom. Nē ǀgaub ai ǀgui-i ge ǁî-e nau khoena ǂuru ǁkhāǁkhās ǀkha ǂgaoǂgaoǃnâ tsî ǁîs di mâǃoa-aona dīsādi âna mûǂan kai ǁkhā.

¹⁰ ǁNāpan ge ǂgui khoena hâ, ǀō-aisase xristeǁî kai ge Jodeǁîn hîa harebeoǃnâ ǃhoa-ain ǀkha nau khoena khâikhâiǃnâ tsî ra ǂgaeǂhapuna.

¹¹ Nē harebeoǃnâ ǁkhāǁkhāde ǃnōǃnō, ǀnai aitsama ǃkhūǃkhūsens ǃaroma hoaraga omaride amaba xu ge a ǂgaeǂhapude.

¹² ǁÎgu ǂûgu di ǀguib, Kretas di kēbo-aob ge ǁîgu xa nēti ge mî: “Kretas khoen hoan ge hoaǁae ǂhumi-ao, ǁaixa ǀguru tsî a ǀopesa ǁgano-ao.”

¹³ Nē ǃkhō-ams ge a ama. ǁNā ǃkhais ǃaroma ǁîna īǁkhā i as kōse karosase ǃkhâikhom, în ǂgoms ǃnâ ǀgai.

¹⁴ Tā harebeoǃnâ ǀnoreǃhoa-ain Jodeǁîn din tsî khoen hîa ǁîn di ǁâga amab ai ge daban di mîmādi tsîna ǂâi i xare-e ǂnûi-ai.

¹⁵ ǃAnu ǂgaoba ūhâ khoe-i hoa-i ǃaroman ge xūn hoana a ǃanu. Xawe ǂgomoǃnâ tsî ǀurixa ǂâide ūhâ-i ǃaroma i ge xū-i xare-e ǃanu tama hâ, ǁî-i di ǂâis tsî ǂgaoǂans a ǃanuoǃnâ xui-ao.

¹⁶ ǁÎ-i di ûiǀgaub ǀkha Eloba ra ǂharaǃâ, ǁîba i a ǂan ti ra mî. ǁNāti ī khoe-i ge Elob xa ra ǃharaxūhe, ǁîba i ǁnâuǀnam tama hâ tsî ǃgâina dīs ǃaroma a harebeoǃnâ xui-ao.