ǂKhoamîdi 15 - Khoekhoegowab Elobmîs 2020

¹ ǃGâi ǀgaub ai khoe-e ǃereams ge ǁaiba ra ūbē, xawe karosa ǃereams ge ǁaiba ra ǃkhāǃnâ.

² Gā-ai khoe-i nams ge ǂansa xu ra ǃhoa, xawe gâre khoe-i amsa xub ge gâresib ǀguiba ra ǂoaxa.

³ ǃKhūb mûra ge mâ ǃkhai-i hoa-i ai hâ tsî ǂkhabab tsî ǃgâib tsîkha ra mû.

⁴ ǃGâi mîdi ge ûib di hais khami ī, xawe ǂhumiǃnâ nams ge gagasa ra hîkākā.

⁵ Gâre khoe-i ge ǁî-i îb di ǁgui-aisa ra ǃharaxū, xawe ǃkhâikhomsa ga ǁnâuǀnam khoe-i ge a gā-ai.

⁶ ǂHanu-ai khoe-i oms tawab ge ǃnāǂamsa ǁuiba hâ, xawe eloxoresa khoe-i hōǂgās ge ǁî-e ǃgomsib ǀguiba ra hā-ūba.

⁷ Gā-ai khoe-i amǁgaukha ge ǂansa ra tsoro, xawe gâre khoe-i ǂgaob ge ǁnāti ī tama hâ.

⁸ Eloxoresa-i ǁguibas ge ǃKhūb aiǃâ a ui-uisa, xawe ǂhanu-ai khoe-i ǀgores ge ǁîba ra ǃgâiaǂgao kai.

⁹ Eloxoresa-i daob ge ǃKhūb aiǃâ a ui-uisa, xaweb ge ǁîba ǂhanu-aisiba ra sauruǃgon khoena ǀnam.

¹⁰ ǂHanu daoba xu ra ǁgôa khoe-i hoa-i ge ǃgomse nî ǁkharahe; ǂgōǀauhe ǂgao tama khoe-i ge nî ǁō.

¹¹ ǁŌhân Hâǃkhaib tsî ǁŌb ge ǃKhūb aiǃâ ǁkhowa-amsase ǁgoe, mâtikō ǃnāsase khoen di ǂgaogu tsîna!

¹² ǃHō-ao-i ge ǁî-e ra ǂgōǀau khoe-e a ǃhuisa, ǁî-i ge gā-ai khoen ǀkha ǁaeǁaesen tide.

¹³ ǃGâiaǂgaoxa ǂgaob ge aisa ra ǂkhî kai, xawe tsûaǂgaob xas ge gagasa ra ǂkhū.

¹⁴ ǁNâuǃāxa khoe-i ge ǂansa hōsa ra ǁgūba, xawe gâre khoe-i ams ge gâresib ǀkha ra ǂûmāsen.

¹⁵ ǁGâiǀāb ǃnâ hâ khoe-i ûitsēdi hoadi ge a ǃgom, xawe ǃgâiaǂgaoxa khoe-i ûib hoab ge a ǁâudī.

¹⁶ ǀGâsase hâ tsî ǃKhūba ǃaoǃgâs ge a ǃgâi, ǃkhū tsî ǂōǂōsib ǃnâ ǀgui hâs xa.

¹⁷ ǀNammi hâǃnâ ǃuis ǂûs ǃhanaǂûn ǀkha hâs ge a ǃgâi, ǁkhangub hâǃâ kaukausa tsâuba ǂûs xa.

¹⁸ ǃHae ǁaixa khoe-i ge ǂnoaguba ra ǃaroma, xawe ǃnūǃnâxa khoe-i ge ǂkhîba ra hā-ū.

¹⁹ ǀOpesa khoe-i daob ge ǁkhūn xa ǀoa hâ, xawe ǂhanu-ai khoe-i daob ge a ǂhau.

²⁰ Gā-ai ǀgôa-i ge ǁî-i îba ra ǂkhî kai, xawe gâre khoe-i ge ǁî-i îsa ra ǃharaxū.

²¹ Gâre khoe-i ge ǁî-i gâresib xa ǃgâiaǂgaose ībahe, xawe gā-ai khoe-i ge ǂhanuse ra ûi.

²² ǀApemā-i ga ǀkhai, on ge xūna ǂhanuse aiǃgû tama hâ, xawe ǂgui ǀapemā-aon hâpa i ge ǃgâise nî aiǃgû.

²³ ǂHanu ǃereamsa mās ge khoe-e ra ǃgâiǂgao kai, ǂhanu mîsa ǂhanu ǁaeb ai mîs ge a ǃgâi.

²⁴ Gā-ai khoe-i daob ge ǀgapisebǀî hâ ûib ǃoa ra ǃgû, tsî ǁŌhân Hâǃkhaib ǃoa ǁgôa tama.

²⁵ ǃKhūb ge ǀgapiǂâixa khoe-i omsa ra khôaǁnâ, xawe ǃoataras di hâǃkhaiba ra ǃûi.

²⁶ Eloxoresa-i ǂâidi ge ǃKhūba ui-uisaba, xawe ǃanu khoe-i mîdi ge ǁîba a ǃgâiba.

²⁷ Xūǃgunuxa khoe-i ǂhanuoǃnâ hōǂgās ge ǁî-i omarisa ǂōǂōsiba ra hā-ūba, xawe ǀhôagaosiba ra ǁkhan-i ge nî ûi.

²⁸ ǂHanu-ai khoe-i ge aibe ǂâiǃgâ tsî ǀgui ra ǃeream, xawe eloxoresa-i amsa xub ge ǂkhabab ǀguiba ra ǂoaxa.

²⁹ ǃKhūb ge eloxoresa-e xu a ǃnū, xawe ǂhanu-ai khoe-i ǀgoresa ra ǁnâu-am.

³⁰ Mûra ǂkhaisib ge ǂgaoba ra ǃgâiaǂgao kai, tsî ǃgâi ǂhôa-i ge sorosa ra ûi-ûi.

³¹ ǂGōǀausa ra ǃgâ khoe-i ge ûi tsî gā-ai khoen ǁaegu ǁgâuǁîse nî tsâ.

³² ǁGauǃnâhesa ga mâǃoa khoe-i ge ǁî-aitsama ra ǃharaxūsen, xawe ǂgōǀausa ra ūǃoa khoe-i ge ǁnâuǃāba ra hōbasen.

³³ ǃKhūba ǃaoǃgâs ge gā-aisib ǃnâ ǁgauǃnâhesa tsî ǃgamǃgamsens ge ǃgôasiba hōs aiǃâ ra hā.