ǀGapiǁnaetsanas 7 - Khoekhoegowab Elobmîs 2020

Aorekhoeb

¹ Mâtikōse ra a îsa ǂaira âsa, ǁharora ǃnâ îsa ǀgôase. Sa ǂnamira di ǃgupusib ge ǃgomǀgausa ǀuira, ǂansa ūhâ ǀuikuru-aob ǃomsîsenni dira khami ī.

² Sa sunis ge ǃgupu ǃores, ǁîs ǃnâ ǂnâhe hâ ǂauxûi-i ǂnâǂoa tamas khami ī. Sa ǁkhoms ge ǃhoroǀhaos, lelin ǀkha ǁgâuǂnamisas khami.

³ Sa samra ge ǃaris di ǂkhamrora, ǁgûs di ǀgēra khami ī.

⁴ Sa ǃaos ge ǂkhoaǁgûǂgō-ommi khami ī. Sa mûra ge Hesbons damra, Bat-Rabims di ǂgâ-ams tawa hâra khami ī. Sa ǂguis ge Libanonni di ǂgō-ommi Damaskusǀî ra kōb khami ī.

⁵ Sa danas ge Karmelǃhommi khami ī, danaǀûn âs ge ǂkhai ra ǂnūba ūhâ tsî îsasib ân ǀkha gao-e ǃkhōsis ǃnâ a ūhâ ǁkhā.

⁶ Mâtikōses a îsa tsî mâtikōses a ǀnamǀnamsa, ǀnamsase ǃgâiǃgâisendi âs ǃnâ.

⁷ Sa soros di gaxusib ge palmhais khami ī samra âs ge draibeǃkhomara khami ī.

⁸ Tita ge palmhais ai ǂharo tsî ǁîs ǁnâugu ai nî ǃkhōbasen. A ra samra âsa draibeǃkhomara khami tita ība tsî ǂguis âs di hamma apeldi khami.

⁹ Ams âs ge ǃgâi ǂauxûi-i ti ǀnamsas di-i ǂkhanuse ǁnān ǁom hân di amǁgauga-u ra ǂgâ-i khami ī.

Tarekhoes

¹⁰ Tita ge a ti ǀnamsab di tsîb ge ǁîb turaba titaǀî hâ.

¹¹ Hā re ti ǀnamsase îm ǃhanab ǁga ǃgû tsî ǃoesa ǃārodi tawa sī hâǂkhai.

¹² Îm ǃnauǁgoaga draibeǃhanagu ǃoa ǃgû tsî ǁhare gu gosa sī mû. Tsî xranathaidi ǁnāpa ǁhare hâsa. ǁNāpa ta ge ti ǀnamma nî mā tsi.

¹³ Dudaimdi ge ǁamab âde sam dao-ams tawa ra ūǀkhī tsî ta ge ǃkharagaǃnâgu xūn, ǀasan tsî ǀorona sâuba tsi hâ, ti ǀnamsatse.