1 Timoteub 3 - Khoekhoegowab Elobmîs 2020

Kerkheb di ǂgaeǂgui-aon

¹ Ama ǂgomǂgomsa mîs ge nēsa: Kerkheb di ǂgaeǂgui-ao ǂgao ra khoe-i hoa-i ge ǃgôaǃgôasa ǃereamsa ra tura.

² Kerkheb ǂgaeǂgui-ao-i ge nî ūo; ǁî-i ge ǃgameb ǃnâ ǂgomǂgomsa, ǃnomsa, ǁkhaesenxa, gā-ai ǂgaoba ūhâ tsî ǃgâi gomma nî ūhâ. ǁÎ-i ge khoexasiba ǃhaokhoen ǃoa nî ūhâ tsî ǁkhāǁkhās ǂansa nî ūhâ.

³ Kerkheb ǂgaeǂgui-ao-i ge ǀhoro tamas ka io ǃkhamxa tide, xawe i ge nî tsamtsiǃnâ tsî ǂkhîxaǃnâ tsî mariǃgunuxa tide.

⁴ ǁÎ-i ge ǁî-i ǂû-i di omarisa ǂhanuse ǂgaeǂgui tsî ǀgôan â-i xa ǃgôahe tsî nî ǁnâuǀnamhe.

⁵ ǁÎ-i omaris ǂûsa ga ǂhanuse ǂgaeǂgui ǁoa khoe-e kha mâ ǀgaus ai Elob di kerkheba ǂgaeǂgui ǁkhā?

⁶ Kerkheb ǂgaeǂgui-ao-i ge Xristesi ǂgoms ǃnâ kaise ǀasa tide, kaise i nî ǁî-e ǂnīsase tsâsen tsî ǃhaese ǁgâuab* di ǀgoraǃgâs ǃnâ ǁnā xui-ao.

⁷ Kerkheb ǂgaeǂgui-ao-i ge hoaraga ǀhûhâsib khoen xa nî ǃgôahe tsî kerkheb ǃnâ ǀgui tama, î-i tā ǁgâuab di ǁnoa-i ǃnâ ǁnā tsî taotaosa xū kai.

Kerkheb di ǃoaba-aon

⁸ ǁKhā ǀgaus ain ge kerkheb di ǃoaba-aona ǃgâi aiǁgausa nî ūhâ tsî ǀgamnamxa tide. ǁÎn ge ǀgaisa ǂauxûi-ā-ao tamas ka io mariǃgunuxa tide.

⁹ ǂHaiǂhaisa amab Xristesi ǂgoms dib ǃaroman ge ǂgomǂgomsa tsî ǃgāsa ǂgaoǂansa nî ūhâ.

¹⁰ ǃOabas ǃnân nî mâiǂgāhes aiǃân ge aibe ǀnî ǁgauǂuis sîsenga ra ǁgui-aihe, ǁîn ǀgaub tsî ǁkhāsib nî kōhese. Nē ǃâitsâsan ga ǂnao-ose mâǃkharu, o ǀguin ge ra ǃoaba-ao kai.

¹¹ ǁKhā ǀgaub ain ge ǁîn di ǃgame-aogu tsî tarade ǀgausa ûiba nî ūhâ tsî nau khoena mîǁgaiǁgai tamas ka io ǂkhabase ǂgā-am tide. ǁÎn ge ǃnomsase tanisen tsî nî ǂgomǂgomsa dīn ra xū-i hoa-i ǃnâ.

¹² Kerkheb ǃoaba-ao-i ge ǁî-i ǃgameb ǃnâ nî ǂgomǂgomsa tsî ǁî-i ǀgôan tsî omarisa ǂhanuse nî ǂgaeǂgui ǁkhā.

¹³ ǁNā ǃoaba-aon hîa ǃgâi sîsenna ra dīn ge khoen di ǃgôasiba ra ǃoaǂuibasen tsî kai ǁaposasiba ūhâ, ǁîn di ǂgoms hîan Xristub* Jesub ǃnâ ūhâs ǃnâ.

Kai ǂganǃgâsib ǂgoms dib

¹⁴ Nē sîǂkhanisa ta ge kai ǃâubasens ǀkha ra xoa, ǃhae ǁaeb ǃnâ ta nî sī ǀhao-ū tsise.

¹⁵ Xawe ta nî ǀhabes ka, ots ge mâtin khoena Elob ommi ǃnâ nî tanisen ǃkhaisa a ǂan ǁkhā, ǁnāb ge a ûitsama Elob di kerkhe, amab di ǂkhâǃnâba.

¹⁶ Nēb ge kai ǂganǃgâsib sada ǂgoms dib khoe-i xare-i a dîǃnâ ǁoaba. Elob ge khoesi īb ǃnâ ǂhaiǂhaihe, Gagab ǃnâ ǂhanu-ai kaihe tsî ǀhomǃgāgu xa ge mûhe. ǁÎb ge ǀūbe ǁaedi ǃnâ aoǁnâhe, ǃhūbaib xa ǂgomhe tsî ǂkhaisib ǃnâ ge ūǃapahe.