Saxaria 5 - Khoekhoegowab 2020

ǃNaniǁî ais: ǁKhana ra xamiǂhanis

¹ ǁKhawa ta ge kōkhâi o ta ge ǁkhana ra xamiǂkhani-e ge mû.

² ǀHomǃgāb ge tare-e ta go mûsa dî te o ta ge “ǀGapise ra ǁkhana xamiǂkhani-i, khoese meterga gaxu tsî haka tsî ǃkhare meterga ǂhaba-e ta ge go mû” ti ge ǃeream.

³ Ob ge ge mîǀî te: “Nēb ge ǀâxareb hîa hoaraga ǃhūb ai nî hāba. ǃNari ra khoe-i hoa-i ge nēpa xu nî ǃhomǂuihe tsî ǂkhabase ga nū-i hoa-i ge nî ǃhomǂuihe, ǁnā ǀâxareb ǁkhāb ǃoa.

⁴ ǃKhūb Hoaǀgaixab ge ra mî: ‘Tita ge ǀâxareba ra sî, ǃnari-ao-i oms ǃnâ tsî ǂkhabase ra nū-i oms ǃnâ nî ǂgâse. ǁNāpa hâ tsî omsa, ǀuin tsî haigu tsîn hoan ǀkha nî hîkākāse.’ ”

Hûǁî ais: ǀHarus ǃnâ ǂnôa khoes

⁵ ǁKhawa ǂhai tsîb ge ǀhomǃgāba ge mû: “Kō ǁnāpa! ǀNî xū-i ge noxopa ǃgoaxa!”

⁶ O ta ge “Tare-e?” ti ge dî. Ob ge “ǀHarus ǂoaxa ras ge. Nēs ge a ǁîn di mû, hoaraga ǃhūbaib ǃnâ,” ti ge mî.

⁷ Tsîs ge ǃgupu, ǂgoaǀuri ǂganaisa ge ūkhâihe. ǁNāpas ge tarekhoesa efab ǃnâ ge ǂnôa i.

⁸ “Nē khoes ge a ǂkhaba” ti mî tsîb ge ǁîsa efab ǃnâ aoǂgā-oa tsî ǂgoaǀuri ǂganaisa ams âb ai ge aoǂnûi.

⁹ Kōkhâi ta ge o ta ge tiǀî ǁkhanaǃgoaxa tarekhoera ge mû, ǃariǃkhās ǁgabogu khami ī ǁgabogu ǀkha. ǁÎra ge efaba ǀhommi tsî ǃhūbaib ǁaegu ge ūkhâi.

¹⁰ O ta ge ǀhomǃgāba “Mâǀî ra efaba ū khoera?” ti ge dî.

¹¹ Ob ge ǁîba “Sinarǃhūb ǃnâ nî sī omsa ombase. Tsîb ge aiǂhomihe tsî ǁnāpa ǁîb di ǂhunuma ǃgaoǃgaob ai nî ǁapoǁapohe.”