Psalmdi 96 - Khoekhoegowab 2020

Elob, ǀgapi gao-aob

¹ ǀAsa am-e ǁnaeba re ǃKhūba! ǁNaeba re ǃKhūba, ǃhūbaits hoatse!

² ǁNaeba re ǃKhūba, ǀons âba kare re. ǁÎb ores di ǂhôasa tsēsa xu tsēs ǁga tani re.

³ ǂAnǂan re ǁîb di ǃgôasiba ǃhaodi hoade, ǁîb di ǀgaisa dīga ǁaedi hoade.

⁴ ǃKhūb ge a kai tsî koahesa anu; ǁîb ge nau elon hoan ǃgâ-ai ǃaoǃgâhesa anu.

⁵ Nau ǁaedi elogu hoagu ge a ǁgôa-elo, xawe ǃKhūb ge ǀhomma ge kuru.

⁶ ǂKhaisib tsî ǃgôasib tsîkha ge ǁîb aiǃâ hâ, ǀgaib tsî anusib tsîkha ge ǁîb hâǃkhaib ǃnâ hâ.

⁷ Koa re ǃKhūba ǁaeso hoaso, koa re ǁîb ǂkhaisib tsî ǀgaib tsîkha.

⁸ Mā re ǃKhūba ǁîb ǀons di ǂkhaisiba ǁguibasa ūkhâi, î ǁîb ai-omgu ǃoa hā re.

⁹ ǃKhūba ǀgoreǀî re ǁîb ǃanusib di ǂkhaisib ǃnâ, ǀkhū re ǁîb aiǃâ, ǃhūbaits hoatse!

¹⁰ ǁAede mîba re “ǃKhūb ge ra gaosîsen! ǃHūbaib ge ǁaposase ǃgaoǃgaohe hâ tsî ǁnobeǁnobehe tide; ǁîb ge ǁaede ǂhanu-aisib ǀkha nî ǀgoraǃgâ.”

¹¹ A gu ǀhomga dâ re, ab ǃhūbaiba ǃgâiaǂgao re an hurib tsî ǁîba ra ǀoaǀoana ǃguru re.

¹² Ab ǃaub tsî ǁîb ǃnâ hân hoana ǃgâiaǂgao; an ǃgarob di hain hoana ǃgâiaǂgaob xa ǂgaiǂui;

¹³ ǃKhūb di ais aiǃâ, ǁîb ra hā ǁîb ra hā, ǃhūbaiba nî ǀgoraǃgâse xuige; ǁîb ge ǃhūbaiba ǂhanu-aisib ǃnâ nî ǀgoraǃgâ tsî ǁaede ǂgomǂgomsasib âb ǀkha.