Psalmdi 95 - Khoekhoegowab 2020

Koatsanas

¹ A da koaǁnaeba re ǃKhūba; a da ǃgarise ǁnaeba re sada ores di ǃgareǀuiba!

² A da ǁîb aiǃâ ganganxasib ǀkha ǀgū re, î da ǁnaetsanadi ǀkha ǃgarise ǁnaeba bi.

³ ǃKhūb Elob ge a kai, hoaraga elon ǂamai a gao-aoba.

⁴ ǃHūbaib di ǃgamsib ge ǁîb ǃomǁae hâ tsî ǃhomgu di ǀgapib ge a ǁîb di.

⁵ Hurib ge a ǁîb di tsî ǁîb ǃomkha ge ǂnâsa ǃhūb tsîna ge kuru.

⁶ Hā re, î da ǃhon tsî ǀgoreǀî bi; hā re, î da ǃKhūb sada Kuru-aob aiǃâ ǃhon.

⁷ ǁÎb ge a sada Elo tsî sada ge a ǁîb di ǃû-ais di, ǁîb ǃommi di gūda, dommi âba nî ǃgâ da.

⁸ Tā ǂgaogu âdo Meribas tsēs ais khami karokaro, Masas tawa du ge ǃgaroǃhūb ǃnâ dī hâ i khami.

⁹ Sadu aboxan ge tita ǁnāpa ǃâitsâ tsî ti sîsenga ge mû.

¹⁰ Hakadisi kuriga ta ge nē ǃhaos ǀkha ge ǁaixa hâ i tsî ta ge ge mî: “Nēn ge ǂgaogu ân ra kā tsî ti daoga ǂan tamana.”

¹¹ ǁNā-amaga ta ge ti ǁaixasib ǃnâ ge nū “Ti sâb ǃnân ǂgâ tide” ti.