Psalmdi 92 - Khoekhoegowab 2020

Karetsanas

Sabattsēs di ǁnaetsanas

¹ ǃGâi i ge a ǃKhūba koaǁnaebasa tsî Hoan xa ǀGapib di ǀonsa karetsanade ǁnaebasa.

² ǁGoaga sa hâhâ ra ǀnamma ǂanǂansa tsî tsuxuba sa ǂgomǂgomsasiba.

³ Disiǁapaxa ǀkhōxūs ǀkha ǃgâi ǀōb harps dib ai.

⁴ ǃKhūtse, sats ge tita ge ǃgâiaǂgao kai sa dīgu ǀkha; sa ǃomkha di sîsengu ǃnâ ta ge ra dâǁnae.

⁵ Mâtikōse gu a kai sa sîsenga ǃKhūtse; ǂâidi âts ge kaise a ǃgam.

⁶ Gâre khoe-i ge ǂan tama hâ tsî gâ-i ge nēsa ǁnâuǃā tama hâ,

⁷ ǂkhaba khoen ra ǁîǁhaiben khami ǀomkhâi tsîn hoan hîa ǂkhababa ra dīna ra ǀomsa, xawen ge ǀams ai ǀamose ra hîkākāhe.

⁸ Xawe sats ge ǀamosib kōse a ǃKhū.

⁹ Kō re sa khākhoena ǃKhūtse ā, sa khākhoen hoan ge nî hîkākāhe; ǂhanuoǃnâsiba ra dīn hoan ge nî ǀgaruǀgaruhe.

¹⁰ Sats ge ti ǁnâba ǃgarogomab dib khami ge ǀgapiǀgapi. ǀAsa ǀkhera-oli-i ǀkha ta ge ǂnâǂamhe hâ.

¹¹ Ti mûra ge ti khākhoen di danhesa ge mû; ti ǂgaera ge ǂkhabadī-aon, tita ǃoagu ra khâikhâisenna ge ǁnâu.

¹² ǂHanu-ain ge palmhaidi khami nî ǀomkhâi, Libanonni ǃnâ hâ sederhaidi khamin ge nî ǀomkhâi.

¹³ ǁÎn ge ǃKhūb ommi ǃnâ ǃhanahe hâ; tsîn ge sada Elob ommi ǃnâ nî ǀomkhâi.

¹⁴ ǁÎn ge kairasib tsîn ǃnâ nî ǂûtani; ǁîn ge kausa tsî ǃamse nî hâ;

¹⁵ “ǃKhūb ge a ǂhanu-ai; ǁîb ge a ti ǃgareǀui; ǂhanuoǃnâsi-i xare-i ge ǁîb ǃnâ a ǀkhai” tin nî aoǁnâse.