Psalmdi 91 - Khoekhoegowab 2020

Elob ge a ti sâu-ao

¹ Hoan xa ǀGapib di sâub ǃnâ ǁan hâ-i ge Hoaǀgaixab di sommi ǃnâ nî hâ.

² ǁÎ-i ge ǃKhūba nî mîba: Sats ge ti ǁhaiǁhâǃkhai tsî ǁkhui-omts ti Elots, ǁîtsa ta ra ǂgomǃgâtsa.

³ ǁÎb ge satsa aniǃkhō-aob di ǁnoasa xu nî ore tsî ǁōǁōsa ǂhīǁōna xu.

⁴ ǁÎb ge ǁgabokha âb ǀkha ra ǃgū-ai tsi, tsî ǁgabokha âb ǃnakats ge nî ǁhaiǁhâ; ǂgomǂgomsasib âb ge ǁkhaukhō tsî a sâuǃkhai.

⁵ Tsuxub di ǃhurib xats ge ǃao tide, tamas ka io ǂāb tsēa ra ǁkhâuheb xa.

⁶ Tsûtsû-ais tsuxuba ra ǃgûmas tamas ka io tsēǃgâǁaeb ai ra hîkākās xa.

⁷ Sa xōǀkhān ga ǀoadisina ǁnā tsî sa amǀkhāb ai disiǀoadisina, xawen ge sa ǀgūse hā tide.

⁸ Sa mûra ǀkha ǀguits ge kō tsî ǂkhaba khoen di mādawa-amsa nî mû.

⁹ Sats ǃKhūts ge a ti ǁhaiǁhâǃkhai. Hoan xa ǀGapibats ge sa ǁanǃkhaise ge dī,

¹⁰ tsî i ge tsū-i xare-e hāǂam tsi tide, ǁkhāti tsûtsû-ai-i xare-i ge sa tentomsa ǀgū tide.

¹¹ ǁÎb ge ǀhomǃgān âba nî mîmā în sa ǃgûdaogu hoagu ai ǃûi tsi.

¹² ǁÎgu ge ǃomgu ai nî tani tsi ǂais âtsats ǀui-i ai ǃnom tidese.

¹³ Xamn tsî ǀaon aits ge nî dā; ǂkham xamn tsî ǀaonats ge nî dāǂkhū.

¹⁴ “Titab ǀnam xui-ao ta ge ǁîba nî huiǂui; ti ǀonsab ǂan xui-ao ta ge ǁîba nî sâu.

¹⁵ Titab ga ǂgaiǀî o ta ge ǁîba nî ǁnâu-am, ǂōǂōsib ǁaeb ǃnâ. Tita ge ǁîba huiǂui tsî ǃgôasiba nî mā.

¹⁶ Tita ge ǁîba gaxu ûiǁaeb ǀkha nî ǁâǁâ tsî ta ge ǁîba ti ǃgâiǃōsiba nî ǁgau.”