Psalmdi 90 - Khoekhoegowab 2020

Hakaǁî ǂkhanis Psalmdi 90—106 Elob tsî khoesib

Moseb, Elob aob di ǀgores

¹ ǃKhūtse sats ge sida ǁhaiǁhâǃkhaise ge ība i, ǃhaosa xu ǃhaos kōse.

² ǃHomgu ǃnae tamasa xu; ǃhūb tsî ǃhūbaibats ūǀkhī tamasa xu; ǀamosiba xu ǀamosib kōsets ge satsa a Elo.

³ Sats ge khoesiba tsarab ǃoa oa kai tsî ra mî: “Oahā re khoen ôado.”

⁴ ǀOadisi kurigu ge sa mûǁae ǁaris, ǃgû-ī gos khami, tsî tsuxuǃûiǁaeb khami ī.

⁵ Sats ge ǁîna ra ǀnapubē, ǁîn ge ǁhapo-i ase ī;

⁶ ǀgâb hîa ǁgoaga ǁhaiǂoaxa tsî ǃuia ra ǂnâb khami.

⁷ Sa ǁaib xa da ge ra hîkākāhe, sa ǁaixasib xa da ge ra ǃaoǃaohe.

⁸ Sats ge sida ǃûǂamde sa aiǃâ ra mâi; sida di sâusa ǁorenats ge ǃnâb ǃnâ sida aiǃâ ra hā-ū.

⁹ Sida tsēdi hoadi ge sa ǁaixasib ǃnâ ra ǃkharu, sida kuriga da ge ǀhâimâinǀoms khami ra hâǃkharu.

¹⁰ Sida ûiǁaeb ge hûdisi kuriga, tsî khoe-i ga kaise ǀgaisao ǁkhaisadisi kuriga. Tsî dana xūkha âb ge ǀhupub tsî ǃoab tsîkha. ǃHaeseb ra ǃgû-ī, ǁkhanagaru-i khami da ī amaga.

¹¹ Tari-e sa ǁaixasib di ǀgaiba a ǂan? Tari-e sa ǁgôasib di ǀgaiba a ǂan?

¹² Sida tsēde ǂhanuse ǃgôasa ǁkhāǁkhā da, gā-aisib di ǂgaoba da nî ūhâse.

¹³ ǁKhawa oahā re ǃKhūtse! Mâ ǁaeb kōsets nî ǀhabe? Sa ǃgāna ǀkhomxa re.

¹⁴ Sa hâhâ ra ǀnammi ǀkha ǁgoaga ǁâǁâ da re, î da dâ tsî ǃgâiaǂgao, sida ûitsēdi hoade.

¹⁵ Sidats ge ǃoa kai hâ i tsēdi kō tsēde ǃgâiaǂgao kai da, kurigu ǁîgu ǃnâ da ǃgomma gere tsâga.

¹⁶ A gu sa ǀgaisa sîsenga sa ǃgān tawa mûhesa tsî sa ǂkhaisiba sa ôan tawa.

¹⁷ AbǃKhūb sida Elob di ǃgâisiba sida ai hâ; îb sida ǃomgu di sîsenna ǁapoǁapoba da re, ā, sida ǃomgu di sîsenna ǁapoǁapo re.