Psalmdi 89 - Khoekhoegowab 2020

Elob di ǃgaeǀhaos Davidi ǀkha

Etanni, Esraǁîb di koatsanas

¹ ǃKhūb di hâhâ ra ǀnammi xa ta ge ǀamose ra ǁnae ǂgao ǃhaosa xu ǃhaos kōse ta ge sa ǂgomǂgomsasiba nî ǂhôa.

² Sats ge ra mî: “Ti hâhâ ra ǀnammi ge ǀamose ra omkhâihe ǀhomgu ǃnâts ge sa ǂgomǂgomsasiba ge mâiǁapoǁapo.

³ Tita ge ti ǃkhōǂuisabeb ǀkha ǃgaeǀhao-e ge dī, ti ǃgāb Davidi ǀkha ta ge nūsa ge dī.

⁴ ‘ǀAmosib kōse ta ge sa suriba nî ǁapoǁapo tsî sa tronsa ta ge ǃhaosa xu ǃhaos kōse nî omkhâi.’ ”

⁵ ǀHomgu ge sa buruxa sîsenga ra koa ǃKhūtse; sa ǂgomǂgomsasiba ǃanun di ǀhaos ǃnâ.

⁶ Tari-e ǀhommi ǃnâ ǃKhūb ǀkha a ǀgopeǀnōhe ǁkhā? Tarib elogu ôagu diba ǃKhūb khami ī?

⁷ ǃAnun di ǀapeǀhaos ǃnâb ge Eloba kaise a ǃhuriǃhurisa tsî ǁnān ǁîb ǂnamipe hân ǃgâ-ai a ǃhuriǃhurisa.

⁸ ǃKhū Elo ǂnubidi ditse, tari-e sats khami a ǀgaisa? ǃKhūtse sa ǂgomǂgomsasib ge sa ǂnamipe hâ.

⁹ Sats ge ǁgaosa hurib ǂama ra gaosîsen ǃgabigu âb ga khâi, ots ge ǁîga ra ǃnōǃnō.

¹⁰ Sats ge Rahaba ge ǂkhūǂkhū ǃgamhe hâ-i ase; sa ǀgaisa ǁôab ǀkhats ge sa khākhoena ge ǀgaruǀgaru.

¹¹ ǀHommi ge a sa, ǁkhātib ge ǃhūbaib ona a sa; ǃhūbaib tsî ǁîba ra ǀoaǀoan hoanats ge satsa ge kuru.

¹² ǀApas tsî ǃkhawagasats ge satsa ge kuru; Tabori tsî Hermonni tsîkha ge sa ǀons ǃnâ ǃgâiaǂgaob xa ra ǂgaiǂui.

¹³ Sats ge ǀgaisa ǁôaba ūhâ; sa ǃommi ge a ǀgaisa; sa amǀkhāb ǃommi ge ǀgapiǀgapihe hâ.

¹⁴ ǂHanub tsî ǂhanu-aisib ge a sa trons di ǃgaoǃgao; hâhâ ra ǀnammi tsî ǂgomǂgomsasib tsîkha ge sa aiǃâ ra aimâba tsi.

¹⁵ ǀKhaehes ge hâ ǁnā ǁaes dâb di ǀōba a ǂansa; ǃKhūtse ǁîn ge sa ais di ǃnâb ǃnâ ra ǃgû.

¹⁶ Sa ǀons ǃnân ge hoaraga tsēsa ra dâ; sa ǂhanu-aisib ǃnân ge ra ǀgapiǀgapihe.

¹⁷ Sats ge ǁîn ǀgaib di ǂkhaisitsa tsî sa ǀkhomxaǂgaosiba xuts ge sida ǁnâba ra ǀgapiǀgapi.

¹⁸ Sida ǁkhaukhōs ge a ǃKhūb di; sida gao-aob ge a ǃAnu Elo, Israeli diba.

Elob ge Davida mîmâiba mîmâis

¹⁹ Ī-i ǃnâts ge ge sa ǂgomǂgomsa khoen ǃoa ge mî: “Ti huiba ta ge ǁē-aob ai ge ǁgui ǁaesa xu ta ge ǀgui khoeba ge ǁhûiǂuibasen.

²⁰ Ti ǃgāb Davida ta ge ge hō ti ǃanusib di ǁnui-i ǀkha ta ge ǁîba ge ǀnau.

²¹ Ti ǃommi ge ǁîba nî ǂkhâǃnâ tsîb ge ǁkhāti ti ǁôaba nî ǀgaiǀgai bi.

²² Khākhoen ge ǁîba ǂkhôadī tide ǂhanuoǃnân ge ǁîba ǁgâiǀā tide.

²³ Tsî ta ge tita ǁîb mâǃoasabena ǁîb mûǁae nî ǂkhūǂkhū tsî ǁnān ǁkhan bi hâna ta ge nî ǂnauǁgui.

²⁴ Ti ǂgomǂgomsasib tsî hâhâ ra ǀnammi ge ǁîb ǀkha nî hâ tsî ti ǀons ǃnâb ge ǁnâb âba nî ūkhâihe.

²⁵ ǁÎb ǃomma ta ge hurib ai nî mâi tsî ǃāgu ai ǁîb di amǀkhāb ǃomma.

²⁶ Tsîb ge ǁîba ‘Sats ge a ti î, ti Elo tsî a ti ǃgâiǃō’ ti nî mî.

²⁷ ǁKhāti ta ge ǁîba ǂguroǃnaesab ase nî dī; ǃhūbaib gao-aogu ǃgâ-ai ǀgapib ase.

²⁸ ǀAmose ta ge ti hâhâ ra ǀnamma nî sâuba bi tsîs ge ti ǃgaeǀhaosa ǁaposase nîra mâ.

²⁹ Tsî ta ge tita ǁîb suriba ǀamose nîra hâ kai tsî trons âba ǀhomgu di tsēdi khami.

³⁰ “ǁÎb ôagu ga ti ǂhanuba ǁnāxū tsî ti mîǁguigu ǃoa ûi tama i;

³¹ ti ǂnûiǂgāde ǁnâuǀnam tama i tsî gu ga ti mîmāde ǃkhōǀgaipe tama io;

³² o ta ge tita ǁîga ǃûǂams âgu ǃaroma haib ǀkha nî ǁkhara tsî tsûtsû-aidi ǀkha ǁîgu ǂhanuoǃnâsiga.

³³ Tsî ta ge tita Davidi ǀkha ta ūhâ hâhâ ra ǀnamma khôa tide tsî ǂkhabase ti ǂgomǂgomsasib ǃnâ sîsen tide.

³⁴ Ti ǃgaeǀhaosa ta ge ǀuriǀuri tide ti amǁgaukha xu ra ǀkhīna ta ge ǀkharaǀkhara tide.

³⁵ “ǀGui ǃnāsa ta ge ti ǃanusib tawa ge nū: ‘Davida ta ge ǂhumiba tide.’

³⁶ ǁÎb ôananôagub ge ǀamose nî hâ trons âb ge sores khami ti aiǃâ nî hâ.

³⁷ ǁKhâb khamib ge ǀamose nî ǁapoǁapohe tsî ǀhommi ǃnâ hâ ǃkhō-amaob ge a ǂgomǂgomsa.”

ǃGaetsanas gao-aob di danhes ǂama

³⁸ Xawets ge satsa ǁîba ǂhara tsî ge ǃharaxū; sa ǂkhauǀkhāsabeb ǀkhats ge ge ǁaixa.

³⁹ Sats ge sa ǃgāb di ǃgaeǀhaosa ge ǂhara; ǁîb kronsats ge ǂgoab ǀkha ge ǀuriǀuri.

⁴⁰ ǁÎb di hoaraga ǂnubiǂgoagats ge ge khôaǁnâ; ǁîb di ǁkhuidets ge ge khôaǂkhū.

⁴¹ ǃKharu ran hoan ge ǁîba ge ǀâǀhana; ǁîb ǁanǁare-aonab ge ǃhōxūse ge ība.

⁴² Sats ge ǁîb mâǃoasaben di amǀkhāb ǃomma ge ǀgapiǀgapi, hoaraga khākhoen ǁîb dinats ge ge ǃgâiaǂgao kai.

⁴³ ǁKhātits ge satsa ǀā ǀkhāb gôab diba ge daba tsîts ge ǁîba torob ǃnâ ge mâhō kai tama ge i.

⁴⁴ Sats ge ǁîba ǂkhaib âba ge ūǀhana tsîts ge krons âba ǃhūb ǁga ge aoǁnâ.

⁴⁵ ǁÎb ǂkhamsis di tsēdets ge ge ǃnubuǃnubu tsîts ge ǁîba taosib ǀkha ge ana.

Ores ǃaroma hâ ǀgores

⁴⁶ ǃKhūtse mâ ǁaeb kōsets kha ǀamose nî gaugausen tsîb sa ǁaixasiba ǀaes khami nî ǂhubi?

⁴⁷ ǂÂihō re mâtikōseb ti ûiǁaeba a ǃnubusa. Tare-i ǃaromats kha khoen ôana ǁause ge kuru?

⁴⁸ Mâ khoeǃnôa-e kha ûi hâ tsî ǁōba mû tide? Tamas ka io ǁŌhân Hâǃkhaib di ǀgaiba xu a ǃnora kaisen ǁkhā?

⁴⁹ ǃKhūtse sa hâhâ ra ǀnammi ǀorosets ge ūhâ ib, sa ǂgomǂgomsasib ǃnâts Davida ge nūbaba mâpa hâ?

⁵⁰ ǃKhūtse sa ǃgāgu di ǃharaxūhes xa ǂâi re ti tîǂams ǃnâ ta hoa ǁaedi di ǃharaxūhesa ra tani ǀgaus xa

⁵¹ ǁîs ǀkhan sa khākhoena gere ǃharaxūhes xa, ǃKhūtse ǁîs ǀkhan sa ǀnausaben di dāǃharode gere ǃharaxūs xa.

⁵² Kare re ǃKhūba ǀamose! Amen tsî amen.