Psalmdi 88 - Khoekhoegowab 2020

Huib ǃaroma hâ ǀgores

Hemanni, Esraǁîb di koatsanas

¹ ǃKhūtse, ti ǃgâiǃōsib di Elotse tsēa tsî tsuxuba ta ge sats ǃoa ra ǂgai.

² As ti ǀgoresa sa aiǃâ sī re sa ǂgaesa ti ǀkhomabasens ǃoa ǂō re.

³ Ti ǀoms ge tsūǀkhāgu xa ǀoa hâ tsî ti ûib ge ǁŌhân Hâǃkhaib ǃoa ra ǀgū.

⁴ ǁNān āb ǃnâ ra ǁgôan tawa ta ge tita ǃgôahe hâ; huio khoe-i khami ta ge ge ī.

⁵ ǁŌ hân ǁaegu khaihe hâ-i khami; ǃgamhe hân, ǀhobas ǃnâ ǁgoen, sats ǁîn xa ǃarulî ǂâi taman, tsî sa ǃomǃnāba xu ǃgaoǁnâhe hân khami.

⁶ Sats ge tita ǃgam āb ǃnâ ge ǂgā ǃkhae ǃgammi ǃnâ.

⁷ Sa ǁaib ge tita ai hâ tsîts ge ǃgabigu âts ǀkha ra ǁgâiǁgui te.

⁸ Ti ǂansabenats ge satsa tita xu ǃnūse ge dībē sats ge tita ǁîna ǃharaxūxūse ge dība. Tita ge ǂganamǂgāhe hâ, tsî ta ge a ǂoa ǁoa;

⁹ ti mûra ge sa ǁgâiǀāb xa ǃoa hâ. Sats ǃoa ta ge tsūǀkhāb ǃnâ ge ǂgai ǃKhūtse tsēkorobe ta ge ti ǃomkha sats ǃoa ge ǀhōǂui.

¹⁰ ǁŌ hâna buruxa sîsenga dībats nî? Tamas ka io khâi gu nî? ǁÎna xare gangan tsin nî?

¹¹ ǀHobas ǃnâ sa hâhâ ra ǀnamma kha ǃgôaheb nî sa ǂgomǂgomsasiba Abadonni ǃnâ hâb a?

¹² ǃKhaenab ǃnâ sa buruxa sîsenga ǂanhe gu nî tsî sa ǂhanu-aisiba ǀurusib di ǃhūb ǃnâ?

¹³ Sats ǃoa ta ge ra ǂgai ǃKhūtse ti ǀgores ge ǃnauǁgoaga sats tawa ra sī.

¹⁴ ǃKhūtse tare-i ǃaromats kha ra ǂhara te? Tare-i ǃaromats sa aisa tita xu ra gaugau?

¹⁵ Tita ge a ǂkhabusa tsî ta ge ra ǁōǁga ti ǂkhamsisa xu, sa ǃaoǃaode ta ge ra tani, tsî ta ge ra ǂkhabu.

¹⁶ Sa ǁaixasigu ge tita ge īǂam sa ǃhuriǃhuridi ge ge hîkākā te.

¹⁷ Hoaraga tsēsan ge ǁgam-i khami tita ge hâǂnami hoatsaman ge ti ǂnamipe ge ǀhao.

¹⁸ Sats ge tita ǀnam hâna tita xu ǃnūse ge dībē, ǃkhaenab ǀguib ge tita hâba.