Psalmdi 85 - Khoekhoegowab 2020

Huib ge ǀgūse hâ

Koraxi ôagu di Psalms

¹ ǃKhūtse sats ge sa ǃhūba ge ǀkhomxa; Jakob di tsūǀkhābats ge ge ǀkharaǀkhara.

² Sa khoen di ǁorenats ge ǁîna ge ǀûba, sats ge ǁoreb âna ge ǃgū-ai.

³ Sa ǁaibats ge ge ū-oa, sa ǀaexa ǁaixasiba xuts ge ge dabasen.

⁴ ǁKhawa ǀasaǀasa da re sida ǃgâiǃōsib di Elotse, î ǁaixasib sida ǃoaguts ūhâba dībē re.

⁵ ǀAmosets kha sida ǀkha nî ǁaixa? ǃHaosa xu ǃhaos kōseb kha sa ǁaiba nî hâ?

⁶ ǁKhawats kha ûi-ûi da ǂgao tama hâ, în sa khoena sats ǃnâ dâ?

⁷ ǃKhūtse sa hâhâ ra ǀnammi di ǃgaeǀhaosa ǁgau da re î sa ǃgâiǃōsiba mā da re.

⁸ ǃKhūb Elob ra mî xū-i hoa-e ta ge nî ǃgâ; ǁîb ge ǂkhîb xa nî ǃhoa ǁîb khoen, ǁîb ǂgomǂgomsan ǀkha, xawen tā ǁîna ǁkhawa gâresib ǃoa oa re.

⁹ Amaseb ge ǃgâiǃōsiba ǁnān ǁîba ra ǃaoǃgâna a ǀgūba, tsîb ge ǂkhaisib âba sada ǃhūb ǃnâ nî ǁan.

¹⁰ Hâhâ ra ǀnammi tsî ǂgomǂgomsasib tsîkha ge ra ǀhao; ǂhanu-aisib tsî ǂkhîb tsîkha ge ra ǁoagu.

¹¹ ǂGomǂgomsasib ge ǃhūba xu ra ǀkhī tsî ǂhanu-aisib ge ǀhomma xu ra kōǁgôaxa.

¹² ǃKhūb ge ǁkhāti ǃgâiba nî mā tsîb ge sada ǃhūba ǁîb ǂûtaniba nî ūǀkhī.

¹³ ǂHanu-aisib ge ǃKhūb aiǃâ nî ǃgû tsî ǁîb dāǃharodi di daoba nîra ǂhomi.