Psalmdi 83 - Khoekhoegowab 2020

Israeli khākhoena dans ǃaroma hâ ǀgores

Asafi Psalms

¹ Elotse, tā ǃnō re; tā ǃnō, î tā ǃnōǃari re Elotse.

² Mû re! Sa khākhoen ge ra khâikhâisen ǁnān satsa ǁkhan hân ge danadi âna ra ǃhâkhâi.

³ ǀHôagao ǀapeǀhaoden ge sa khoen ǃoagu ra dī, ǀguipan ge ǁnān ǁînats ra ǃûin ǃoagu ra ǀapeǀhao.

⁴ “Hā, î da ǁaes âna hîkākā, îs Israeli ǀonsa tā ǁkhawas tsîna ǂâihōhe” tin ge ra mî.

⁵ ǀGuiǂâixasen ge ǀapeǀhao tsî sa ǃoagu ǃgaeǀhaosa ge dī:

⁶ Edommi tentomdi tsî Ismaelǁîn, Moabǁîn tsî Hagarǁîn;

⁷ Gebalǁîn, Amonǁîn, Amalekǁîn, tsî Filistiab tsî Tirus di ǁanǂgāsaben hoana.

⁸ ǁKhātin ge Asiriaǁîn tsîna ǁîn ǀkha ge ǁaeǁaesen tsîn ge ǁôab ase Loti ôana ge ība.

⁹ Midianni ǀkhas khami ǁîna dī-ū re, Siserab ǀkha tsî Jabinni ǀkhats ge Kisonni ǃārob tawa dī khami.

¹⁰ ǁÎn ge Endors tawa ge hîkākāhe tsîn ge ǃhūba ǀaruse ge ība.

¹¹ ǁÎn di ǀgapiǃgôasan ǀkha Oreb tsî Seeb tsîkha ǀkhas khami dī re Sebab ǀkha, Salmunab ǀkha tsî hoaraga gaosagu ǁîn digu

¹² hîa “A ge ūbasen, Elob di ǃûǃhūba” ti ge mîgu ǀkhas khami.

¹³ Ti Elotse ǁîna sares khami dī re, ǀhōb, ǂoab xa ra ǃgomheb khami.

¹⁴ ǀAes haiǀgomsa ra khauǃkhūs khami ǀaeǁhabub ǃhomga ra ǂhubib khami.

¹⁵ ǁNātits ge ǁîna ǁgaoǂoas khami nî ǃgôaǃgon tsîts ge sares âts ǀkha ǁîna nî ǃaoǃao.

¹⁶ Ais âna taob ǀkha ǀoaǀoa re on ge sa ǀonsa nî ǂgaiǀî ǃKhūtse.

¹⁷ An tao tsî ǃhuri ǀamosib kōse; an taotaohe în kāǁō.

¹⁸ În ǂan sats ǀons âts a ǃKhūts, ǀguits a Hoan xa ǀGapi hoaraga ǃhūbaib ai ǃkhaisa.