Psalmdi 80 - Khoekhoegowab 2020

Israeli di ǀasaǀasahes ǃaroma hâ ǀgores

ǃKhō-ams psalms Asafi dis

¹ Israelǁîn di ǃûi-aotse, ǁnâu re sats Josefi ǃhaosa gūn khami ge ǂgaeǂguitse sats, xerugu ǁaegu ǀgapise ǂnôatse, aiǃâb ǃoa ǂkhai re.

² Efraimmi, Benjaminni tsî Manaseb ǃhaos aiǃâ sa ǀgaiba ǂkhaiǂkhaikhâi re, î sida di ores ǃoa hā re.

³ Elotse, ǁkhawa ǀasaǀasa da re, î ais âtsa ǃnâ kai, î da sâuhe re.

⁴ ǃKhū Elo Hoaǀgaixatse mâs kōsets kha sa khoen di ǀgoredi ǃoagu ra ǁaixa?

⁵ Sats ge ǁîna ǁgamrona ǂûxūse ge mā tsîts ge ǁîna ǃnonaǁîǃâb di ǀnōb kōse ǁgamron ǀkha ge āsi.

⁶ Sats ge sida sida ǁanǁare-aon di ǂnoaguxūse ge dī tsîn ge sida khākhoena ge âiǂui da.

⁷ Hoaǀgaixa Elotse, ǀasaǀasa da re, î ais âtsa ǃnâ kai, î da sâuhe re.

⁸ Egipteb ǃnâts ge draibehaiba ge ūǂui; ǁAede sauruǂui tsîts ge ǁîba nēpa hā ge ǃhana.

⁹ Sats ge ǁîba ǃkhai-e ge ǂhomiba tsîb ge ǁîba ǃnomaǃkhō tsî ǃhūba ge ǀoaǀoa.

¹⁰ ǁÎb di sommi ge ǃhomga ge ǃgū-ai tsî ǁnâugu âba Elob di sederde.

¹¹ ǁNâugu âbab ge hurib kōse ge ǀhōǂui ǂkham ǂhonagu âba ǃāb kōse.

¹² Tare-i ǃaromats ǁîb di ǂnubiǂgoaba ge khôaǁnâ tsîn ǁnāpa-u ra ǃkharun hoana ǁîb ǂûna ra ǃora?

¹³ ǃGarob di hāgūn ge ǁîba ra hîkākā tsîn ge ǃhanagu ǃnâ ra ǃgûmana ǁîba ra ǃû.

¹⁴ Hoaǀgaixa Elotse sida ǃoa ǂnan re; ǀhomma xu kōǁnâ î mû re. Nē draibehaiba kōǀî re,

¹⁵ tsî ǃnomagu sa amǀkhāb ǁôab ge ǃhanaga, ǂhonab aitsamats ge ǀgaiǀgaibasenna.

¹⁶ ǁÎb ge ǀaes ǀkha khauǃkhūhe hâ, ǁîb ge ǁhāǁnâhe hâ, sa ǂgōǀaus xan ge khoena nî kāǁō.

¹⁷ Ab sa ǃomma sa amǀkhāb ǃomma ai hâ khoeb ai hâ khoen ôab ǁîbats ǀgaiǀgaibasen hâba.

¹⁸ Satsa xu da ge dabasen tide; ǁkhawa ûi-ûi da re, o da ge sa ǀonsa nî ǂgaiǀî.

¹⁹ ǃKhū, Elo Hoaǀgaixatse, ǀasaǀasa da re, î ais âtsa ǃnâ kai, î da sâuhe re.