Psalmdi 79 - Khoekhoegowab 2020

Jerusalems nî ǀkhomhe ǃkhais di ǀgores

Asafi Psalms

¹ Elotse, ǁaedi ge sa ǃhūb ǃnâ ge hā ǁîn ge sa ǃanusib di Tempela ge ǀuriǀuri ǁîn ge Jerusalemsa ge ǂkhūǂkhū.

² Sa ǃgāgu di soroden ge ǂûxūse ǀhomanina ge mā, sa ǂgomǂgomsa khoen di ǁgan-e ǃaub ǀguruna.

³ ǁÎn ǀaoban e ǁgam-i khami Jerusalems ǂnamipe ge ǂnâǂui tsî-i ge khoe-i xare-i ǁîna nî ǁkhō-e ge ǀkhai i.

⁴ ǁAnǂnami da hâ ǁaedi di ǃharaxūxū kai da ge ge; ǁnān sida ǂnamipe hân di ǃhō tsî ǃkhāǃkhāxūse da ge ge ī.

⁵ ǃKhūtse mâs kōse? ǀAmosets kha nî ǁaixa? Sa tauxasiba kha ǀaes khami nî khau?

⁶ Sa ǁaixasiba ǁaedi satsa ǂan tamadi ǃoagu ǁhōǂui re, gaosin sa ǀonsa ǂgaiǀî taman ai.

⁷ ǁÎn ge Jakoba hapu tsî ǁanǃkhaisa âba hîkākā xuige.

⁸ Aiǃâkam dīsādi sida didi xa tā ǂâi re; ab sa ǀkhomxaǂgaosiba ǃgûǃoa da re, kaise da go ǂkhabu xuige.

⁹ Sida ǃgâiǃōsib di Elotse, hui da re sa ǀons di ǃgôasib ǃaroma. Ore da, î sida ǁorena ǀûba da, sa ǀons ǃaroma.

¹⁰ Tare-i ǃaroma di ǁaede nî mî: “ǁÎn Eloba mâpa hâ?” As ǁaedi ǃnâ sats ra sa ǃgān di ǀaob ǂnâxūhe geba ǀkhaoba ǃkhaisa ǂansa re.

¹¹ As sa aiǃâ hā re, ǃgaes ǃkhōsaben disa, sa ǁôab di ǁkhāsib ǀkha ǁōb di ôana ǃnora kai re.

¹² Î sida ǁanǁare-aona hû ǃnādi kōse ǁîn ǃharaxūba mādawa-am re ǁîb ǀkhan ge satsa ǃharaxūba.

¹³ O da ge sida, sa khoeda, sa ǃû-ais di gūda ǀamose nî gangan tsi tsî ǃhaosa xu ǃhaos kōse satsa nî koa.