Psalmdi 78 - Khoekhoegowab 2020

Elob tsî ǁîb di khoen

Asafi ǀgaipetsanas

¹ ǁNâu re ti ǁaese, ti ǁkhāǁkhāsa sadu ǂgaesa di ams di mîdi ǃoa ǂō re.

² ǂKhōdi ǃnâ ta ge nî ǃhoa; ǃgôa-ī ge ǁaeb di ǂganǃgâsigu ǃnâ ta ge nî ǃhoa.

³ Xūn ǁnâu ta gen tsî ǂan da an, sada aboxagu ge ǁgamba dan,

⁴ ǁîna da ge sida ôana xu gaugau tide; ǃGoaxa suriba da ge ǃKhūb di ǂkhaisa dīgu tsî ǁîb di buruxa sîsengu xa nî ǃhoaba.

⁵ ǁÎb ge Jakob ǃnâ mîmā-e ge ǃgaoǃgao tsî ǂhanuba Israeli ǃnâ ge ǁgaumâi, sada aboxanab ge ǁîn ôanan nî ǂanǂanse mîmā khami.

⁶ În ǃgoaxa a surib dina ǂan ǀgôan noxopa nî ǃnaese ina. ǁÎn ge kaikhâin kao ǁîn ôana nî ǁgamba.

⁷ ǁÎn ge Elob ai nî ǂgomaiǂnûi, tsîn ge Elob di dīga ǀuru tide tsîn ge ǁîb mîmāde nî ǃkhōǀgaipe.

⁸ În tā ǁîn di aboxan khami ī; ǃnâudanaxa tsî khâikhâisenxa ǁaes ǂgaogu ân ǁaposa tama tsîs gagas âna Elob ǃoagu ǂgomǂgomsa tama ge hâ ina.

⁹ Efraimǁîn toroǃkhamaogu khādi tsî ǂāgu ǀkha ǁâtanisen hâgu ge torob tsēs ai ge ǃkhoeni.

¹⁰ ǁÎn ge Elob di ǃgaeǀhaosa ge ǃkhōǀgaipe tama hâ i tsîn ge ǁîb ǂhanub ǃnâ ǃgûsa ge ǂkhā.

¹¹ ǁÎn ge ǁîb di dīga ge ǀuru, buruxa sîsengu, ǁînab ge ǁgauga.

¹² ǁÎn di aboxan aiǃâb ge ǁîba buruxa dīna gere dī Egipteb ǃnâ, Soans di ǀkharib ǃnâ.

¹³ ǁÎb ge huriba ǀgora tsî ǁîna ge ǃkharu-ū ǁîb ge ǁgamga ǂgōse ǂnubiǂgoab khami ge mâ kai.

¹⁴ Tsēab ge ǁîna ǃâus ǀkha gere ǂgaeǂgui, tsî hoaraga tsuxuba ǀaes di ǃnâb ǀkha.

¹⁵ ǃGaroǃhūb ǃnâb ge ǁîba ǃgareǀuiga ge ǂari kai tsî ǁîna ǃgamma xu ǁgam-e ge mā.

¹⁶ ǁÎb ge ǀuisa xu ǃāroga ge dâu kai tsîb ge ǁgamga ǃāgu khami ge dâuǁgôa kai.

¹⁷ Xawen ge ǁîna ǁkhawa ǁîb ǃoagu gere ǁore, ǃgaroǃhūb ǃnân ge Hoan xa ǀGapib ǃoagu ge khâikhâisen.

¹⁸ ǁÎn ge Eloba ǂgaob ân ǃnâ gere ǃâitsâ ǁîn ra tura ǂûna ǂgaoǀkhā bis ǀkha.

¹⁹ Elob ǃoagu ǃhoa tsîn ge gere mî: “Eloba ǃgaroǃhūb ǃnâ tāba ǂhomi ǁkhāb a?

²⁰ ǀUisab ge ǂnau o gu ge ǁgamga ge ǂoaxa, ǃārogu ge ge dâuǂam; xawe ǂû-e tāb ai ǂhomi ǁkhāb nî xare? ǁGan-eb xare ǁîb khoena nî ǂhomiba ǁkhā?”

²¹ Nēnab ge ǁnâu ob ge ǃKhūba kaise ge ǁaixa; tsîs ge ǀaesa Jakob ǃoagu ge ǂhubi tsîb ge ǁaib âba ǁkhāti Israeli tawa ge sī.

²² ǁÎn ge Elob ǃnâ ǂgom tama hâ i tsî ǁîb ores ǀgaiba ǂgomǃgâ tama hâ i amaga.

²³ Tsîb ge ǁîba ǃâudi ǀgapise hâde mîmā tsî ǀhommi di dao-amde ge ǁkhowa-am.

²⁴ Tsîb ge ǁîn ai manaba ge ǀapi kai; ǀhommi di ǃhorobab ge ǁîna ǂûn nîse ge mā.

²⁵ Hoan ge ǀhomǃgān di pere-i xa ge ǂû ǁîb ge ǁîna ǃnāǂamsasib ǃnâ sîba-e.

²⁶ ǁÎb ge ǀhomga xu aiǂoas ǂoaba ge ǃgom kai ǁîb ǀgaib ǀkhab ge ǃkhawagas ǂoaba ge ǂgaeǂgui.

²⁷ Tsîb ge ǁîn ai tsarab khami ǁgan-e ge ǀapi kai hurib amǃgâ ǁgoe ǃhūb khami ǁgaboxa anina.

²⁸ ǁÎn di hâǃkhaib tawab ge ǁîna ge ǁnā kai ǁîn tentomdi di ǂnamipe.

²⁹ Tsîn ge ǂû tsî kaise ge ǁâ; Elob ge ǁnā ǀgaus ai turan ge xūna ǁîna ge mā.

³⁰ Noxopan turab ân xa ǂâu tama hâ tsîn noxopa ǂû-e amǃnâ ūhâ

³¹ hîab ge Elob di ǁaiba ge khâi tsîb ge ǁîn di ǀgaisa khoegu ǂkham khoegu Israeli diga ge ǃgam.

³² Nēn hoan ǃnân ge ǁîna ǁkhawa ge ǁore tsîn ge ǁîb di buruxa sîsenga ǂgom tama ge i.

³³ Tsîb ge ǁîba tsēdi âna ǁausib khami ge ǀamǀam tsî kurigu âna ǃaob ǃnâ.

³⁴ ǁÎb ga ǁîna ǃgam, on ge ǁîba gere ôa on ge oa tsî Eloba gere ôa.

³⁵ ǁÎn ge Elob a ǁîn di ǃgareǀui ǃkhaisa ge ǂâihō, Elob, Hoan xa ǀGapib a ǁîn ore-ao ǃkhaisa.

³⁶ ǁÎn ge ams ân ǀkha ǁîba gāxaǃnâ tsî nams ân ǀkha ǁîba gere ǂhumiba.

³⁷ ǂGaob ân ge ǁîb ǃoagu ge ǁaposa tama hâ i tsîn ge ǁîb ǃgaeǀhaos ǃnâ ge ǂgomǂgomsa tama hâ i.

³⁸ Xaweb ge Eloba ge ǀkhomxaǃnâ i tsî ǁorena ǀûba tsî ǁîna hîkākā tama ge i. ǂGui ǃnādeb ge ǁaib âba ge ǂgae-oa tsî ǁaixasib âba ge ūdawa.

³⁹ ǁÎb ge khoes ǀguisan i ǃkhaisa ge ǂâihō ǃgomǃkharu ra ǂoab, ǁkhawa oaǀkhī tamab khami.

⁴⁰ Mâtikō ǃnāden ge ǃgaroǃhūb ǃnâ ǁîb ǃoagu khâikhâisen; ǁîba ǃgarob ǃnâ ge tsûtsû.

⁴¹ Tsîn ge ǁkhawa tsî ǁkhawa Eloba gere ǃâitsâ tsî Israeli di ǃAnuba ge tsûtsû.

⁴² Tsîn ge ǂâihō tama ge i ǃommi âb ǁîna khākhoen âna xu ge ǃnoraǃnora ǃkhaisa.

⁴³ Egipteb ǃnâb ge ǁîb saode ge dī, tsî buruxa sîsengu âba, Soans ǃnâ.

⁴⁴ ǃĀgu ânab ge ǀaob ǃnâ ge ǀkharaǀkhara tsîn ge ǃārogu âna xu ge ā ǁoa i.

⁴⁵ ǂHoms ǀgînanab ge ǁîn ǁaegu ge sîǂgā ǁîna gere nâna, tsî ǁgūtsiǁgūben ge ǁîna gere hîkākāna.

⁴⁶ ǁÎn di ūǀkhīnab ge ǂhomna ge mā; ǁîn ǀhupub di ǂûtaniba ǂhomna.

⁴⁷ ǁÎn draibehaideb ge ǃnareb ǀkha ge ǃgam tsî ǁîn di ǀnomade ǃnareb ǀkha.

⁴⁸ ǁÎn gomanab ge ǃnareb ǀkha ge ǃgam tsî ǀgoan âna napab ǀkha.

⁴⁹ ǁÎb ge ǁîn ai ǁîb di ǀaexa ǁaixasiba ge sîǁnâ ǁgôasib tsî ǀkhomoǃnâsib tsî ǂōǂōsib tsî ǂguiǃnâgu tsû-ain di sîsabegu tsîna.

⁵⁰ ǁÎb ge ǁaib âba daoba ge dība ǁîn ûibab ge ǁōba xu ūbē tama ge i xaweb ge ǁîn ûiba ǂhīǁōba ge māǁnâ.

⁵¹ ǁÎb ge Egipteb di ǂguroǃnaesaga ge ǃgam ǂguroǃnaesagu Xammi tentomdi diga.

⁵² ǁÎb ge ǁaes âba gūn khami ge ǂgaeǂguiǂui tsî ǁîna ǃgaroǃhūb ǃnâ gere ǂgaeǂgui.

⁵³ Tsîb ge ǁîna ǃnorasase ge ǂgaeǂgui tsîn ge ǃao tama ge i xawen ge khākhoen âna hurib xa ge ǃgū-aihe.

⁵⁴ Tsîb ge ǁîna ǁîb ǃanusib di hâǃkhais tawa ge sī-ū, ǁîb di amǀkhāb ǁôab ge danbasen ǃhommi tawa.

⁵⁵ ǁÎb ge ǁîn aiǃâ ǃhaode doeǁgaǂui tsî ǁîdi di ǃhūba ǁîna ǀumixūse ge mā tsîb ge Israeli ǃhaode ǁîn tentomdi ǃnâ ge ǁan kai.

⁵⁶ Xawen ge ǁîna Elob, Hoan xa ǀGapiba ǃâitsâ tsî ge ǁaiǁai tsîn ge ǁîb mîmāde ǃkhōǀgaipe tama ge i.

⁵⁷ Xawen ge ǁîn aboxan ǁkhān khami îǂhôaoǃnâ i; ǁîn ge gāxaǃnâ khā-i khami ge ī.

⁵⁸ ǁÎn ǀgapi ǃkhaidi ǀkhan ge ǁîba ǁaixab nîse gere ǂoeǂoe; ǁîn di ǁgôa-elogu ǀkhan ge ǁîba ge ǁgonǁgonǂgao.

⁵⁹ Elob ge ǁnâub geo kaise ge ǁaixa, tsîb ge Israelǁaesa hoaragase ge ǂhara.

⁶⁰ Tsîb ge ǁîba Silos di tabernakela ge ǁnāxū khoen ǁaegub ge mâi hâ i tentomma.

⁶¹ Tsîb ge ǀgaib âba ǃkhōsis ǃoa ge māǁnâ tsî ǁîb ǂkhaiba, mâǃoasabeb ǃomǁae.

⁶² ǁÎb khoenab ge gôab ǃnâ ge māǁnâ tsîb ge ǁîb ǀumixūn ǀkha ge ǁaixa hâ i.

⁶³ ǂKham khoegu ge ǀaes xa ge hapuhe tsî di ge ǂkhamkhoede ǃgamehe tama ge hâ i.

⁶⁴ ǁÎb di pristergu ge gôab ǃnâ ge ǁō tsî di ge ǁîgu ǃoatarade ge ā tama hâ i.

⁶⁵ Ob ge ǃKhūba ǂomsa xus khami ge ǂkhai; ǁē-aob ra ǂauxûib xa ǃgâiaǂgao kaihe khami.

⁶⁶ ǁÎb mâǃoasabenab ge ge ǃhae-oa; ǀamo ǃharaxūbab ge ǁîna ge mā.

⁶⁷ Josefi tentomsab ge ge ǂhara; Efraimmi ǃhaosa xub ge ǁhûi tama ge i.

⁶⁸ Xaweb ge Judab ǃhaosa ge ǁhûi; Sionǃhommi kaiseb a ǀnamma.

⁶⁹ ǁNāpab ge ǀgapi ǃkhain khami ǁîb ǃAnu ǃkhaiba ge ǂnubi ǃhūbaib ǀamoseb ge ǃgaoǃgaob khami.

⁷⁰ ǁÎb ge Davidi ǁîb ǃgāba ge ǁhûi tsî ǁîba gūǃharade xu ge ūbē.

⁷¹ Daisi ra gūde xūb ge ge ūhā bi Jakob, ǁîb ǃhaosa nî ǃûise, Israelǁaes ǁîb disa.

⁷² Tsîb ge Davida ǁîna ǂhauǃnâ ǂgaob ǀkha ge ǃûi ǁîb ǃomgu di ǁkhāsib ǀkhab ge ǁîna ge ǂgaeǂgui.