Psalmdi 71 - Khoekhoegowab 2020

Kairasib di ǀgores

¹ Sats tawa ta ge ra gau ǃKhūtse, tā toxopa taotao te re!

² Ore î hui te re sa ǂhanu-aisiba xu, sa ǂgaesa tiǀî ǂō, î ore te re.

³ ǃGareǀuise ība te re, ǁnāǀî ta hugaǀgui nî ǁhaiǁhâse. ǁÎbats ge satsa go mîmā tita oresa; sats ge a ti ǃgareǀui tsî a ti ǁaposa hâǃkhai.

⁴ Elotse eloxoresan di ǃomma xu ore te re, ǁnān ǂhanuoǃnâsiba sîsen tsî ra ǂkhabadīn di ǃomǁaeba xu.

⁵ Sats ge a ti ǃâubasen ti ǃKhū Elotse, ti ǂkhamsisa xu ta ge sats ai ra ǂgomaiǂnûi.

⁶ Sats ai ta ge ti ǃnaesa xu ra ǃgâsen. ǁGûs ǃnāba xu ta ge ǂoaxa tsēs aits ge satsa ge ǃgaoǀnae te. Satsa ta ge ra karehâhâ.

⁷ ǂGuina ta ge aiǁgause ti ûib ǃnâ ge ība, xawets ge satsa a ti ǀgaisa ǁhaiǁhâǃkhai.

⁸ Ti ams ge sa koas xa ǀoa hâ; hoa tsēsa sa ǂkhaisib xa.

⁹ Tā kairasis ǁaeb ǃnâ aoxū te re; ti ǀgaib ga toaxū te, o tā ǁnāxū te re.

¹⁰ Ti khākhoen ge tita xa ra ǃhoa, tsîn ge ǁnān tita ra ǃkhēna tita ǃoagu ra ǀapeǀhao.

¹¹ Tsîn ge ra mî: “Elob ge ǁî-e ǁnāxū hâ! Sao î ǁî-e ǃgam, ǁî-e nî ore khoe-i a ǀkhai xuige.”

¹² Elotse tā tita xu ǃnūse hâ re; ti Elotse ǃhaese ǃnâǃkhoe te re.

¹³ An ti khākhoena taob xa ǁō re; an ǁnān tita ra tsūdī ǂgaona taob tsî ǃharaxūb xa ǃgū-aihe.

¹⁴ Satsa ta ge hugaǀgui ǃâubasen tsî ti koasa hugaǀgui satsa nî ǁnaeba.

¹⁵ Ti ams ge hoaraga tsēsa sa ǂhanu-aisiba nî ǃhoa; sa ǃgâiǃōsiba, ǃgôa ǁoa ta a xawe.

¹⁶ ǃKhūb Elob di buruxa dīga ta nî koase ta ge ra hā; sas ǀguisa i ǂhanu-aisiba ta ge nî ǂhôa.

¹⁷ Elotse sats ge ti ǂkhamsisa xu ge ǁkhāǁkhā te tsî ta ge nēsis kōse sa buruxa dīna ra ǂhôa.

¹⁸ Tsî ǁkhāti kairasis tsî ǀhaiadanasis kōse Elotse tā ǁnāxū te re; sa ǀgaiba ta nē suriba mîba tama hîa, sa ǁkhāsiba, ǁnā surib hîa nî hāba.

¹⁹ Elotse sa ǂhanu-aisib ge ǀgapiseb kōse ra sī. Sats hîa hoan xa kai sîsenga ge dītsa. Tari-e sats khami ī Elotse?

²⁰ Sats hîa tita ǂgui ǂōǂōsigu tsî tsūǃōga ge mû kaits ge oahā tsî tita ǁkhawa ûi-ûi, tsî ǃhūbaib di ǃgamsiba xu nî ūǃapa.

²¹ Sats ge ti kaisiba ǃnāǃnā tsî ǁkhawa nî ǁkhaeǂgao te.

²² ǁKhāti ta ge harps ǀkha sa ǂgomǂgomsasiba nî kare ti Elotse, ǂnunis ǀkha ta ge nî ǁnaeba tsi Israels di ǃAnutse.

²³ Ti amǁgaukha ge satsa nî dâǁnaeba ǁkhāti ti ǀoms ǁîsats ge ores ona.

²⁴ ǁKhātis ge ti namsa hoaraga tsēsa sa ǂhanu-aisib xa nî ǃhoa tsîn ge ǁnān tita ra ǂkhôadī ǂgaona nî taotaohe.