Psalmdi 68 - Khoekhoegowab 2020

Dans di ǁnaetsanas

Davidi Psalms

¹ Elob ra khâi, on ge khākhoen âba ra ǀgaruǀgaruhe; ǁîba ǁkhan hân ge ais âba xu ra ǁhâ.

² ǀAnni ra ǃgombēhes ǁkhas khamits ge ǁîna ra dībē; ǂnuruǁnui-i ra ǀaes ǃnâ tsunis ǁkhās khami, ǁnātin ge ǂkhaba khoena nî kā, Elob ga ǂhaio.

³ Xawen ge ǂhanu-aina ǃgâiaǂgao tsî dâb xa Elob aiǃâ ra urikhâi tsîn ge dâxase ra ǃgâiaǂgao.

⁴ ǁNaeba re Eloba, koatsanade ǁîb ǀons ǃgôasib ǃaroma ǁNāb ǃâudi ai ra ǃgapib, ǀons âb a ǃKhūba ǀgapiǀgapi î ǁîb aiǃâ dâ re.

⁵ ǁNāb hîa ǁgûona ǁgûse ībab, ǃoataradi di ǂnoaba-aob, Eloba, ǁîb di ǃanusib ǃnâ.

⁶ Elob ge ǁnān hîa ra ǀguritsânsena omaridi ǀkha ra ǁanǀhao kai tsî ǃkhōsabena ra ǃnoraǃnora, xawe mâǃoaxan ge ǃgaroǃhūb ǃnâ nî ǁan.

⁷ Elotse sa khoen aiǃâts ge ǃgûǂoao, ǃgaroǃhūb ǃnâts gere ǀnobao,

⁸ ob ge ǃhūba ge ǂgubi. O gu ge ǀhomga ǀnauba Elob aiǃâ ge ǀapi kai Sinaib Elob aiǃâ Elob, Israels dib aiǃâ.

⁹ ǀNanubats ge ǃnāǂamsase ge sî Elotse tsîts ge ǀumis âtsa tsaus ge, o ge ǁapoǁapo.

¹⁰ Sa khoen ge ǁnāpa ǁan hâna; Elotse sa ǃgâisiba xuts ge satsa ǀgâsana ge aiǂhomiba.

¹¹ ǃKhūb ge mîsa ra mā tsî tarekhoedi ǃgâiǂhôasa ra ǂoa-ūdi ge a ǂgui

¹² “Gao-aogu toroǂnubidi digu ge ra ǃkhoeni.” Oms tawa hâ tarekhoedi ge ǁkhâuǁnâxūna ra ǀgoraǂui.

¹³ ǃGaeǃgâǁgarura ǁaegu du ga sī ǁgoeo; ǁnāpa di ge ǂnabudi, ǀhaiǀurib ǀkha ǃkhûǀkhāsa ǁgabogu ǁgaboǀamgu âdi ǂkhai ra ǃhuniǀuriba ūhâde hâ.

¹⁴ Hoaǀgaixab ge ǁnāpa hâ gao-aoga ǀgaruǀgaru tsî Salmonǃhommi ai ǃgomma ge hā kai.

¹⁵ Elob di ǃhomtse, Basanǃhomtse ǃnomxa ǃhomtse, Basanǃhomtse!

¹⁶ Tarexa go surib ǀkha ra kō, ǃnomxa ǃhomgo, ǃhomgo Elob ge ǁîb di ǁanǃkhaise ǁhûiǂuigo? ǃKhūb ge ǀamose ǁîgu ai nî ǁan.

¹⁷ Elob di kunidi ge ǀgam ǃnāra di ǀoadisidi di ǀoadiside ǃKhūb ge Sinaiba xu ǁîb di ǃanusib ǃnâ ge sī.

¹⁸ Sats ge ǀgapiseb ǃoa ge ǃapa tsîts ge ǂgui ǃkhōsabena ge ūsao, tsîts ge ǃnarexūna khoesib tsî mâǃoa-aona xu ǃkhōǃoa tsîts ge ǁnāpa ge ǁan ǃKhū Elotse.

¹⁹ Ab ǃKhūba koahe re, tsēsa xu tsēs ǁga sada ǃgomga ra taniba; Elob sada di huiba.

²⁰ Elob sada Elob ge ra ǃnoraǃnora ǃKhūb, sada ǃKhūb tawas ge ǁōba xu ǃnorasa hâ.

²¹ Amaseb ge Eloba ǁîb khākhoen di danade nî ǂkhūǂkhū, ǀûxa danaǂkhōs, ǁnān ǀhapis ân ǃnâ ra ǃgûman disa.

²² ǃKhūb ge ra mî: “Basanna xu ta ge ǁîna nî oahā-ū; hurib ǃgamsiba xu ta ge ǁîna nî oahā-ū.

²³ ǁÎn ǀaob ǃnâts ǂais âtsa nî dūǂgāse îb sa arigu di namma ǁîb amǃnâsa khākhoena xu ǂû ǁkhā.”

²⁴ Elotse sa ǃgûgan ge ge mû ti Elo tsî Gao-aob ǃgûga, ǃanusib ǃnâ.

²⁵ Aisǀkhāb ain ge ǁnae-aona ra ǃgû ǁîn ǃgâb ai ǀkhō-aona tsî ǁîn ǁaegu ǂkham khoedi ǃkhomǃkharurude ra ǂnaude.

²⁶ Eloba kare re ǀhaohâgu ǃnâ, ǃKhūba kare re Israeli ǀaus dido.

²⁷ ǁNāpab ge Benjaminni, ǂkhamma ǁîna nî ǂgaeǂgui, ǁnāpa xu Judab di ǂgaeǂgui-aoga ǂgui ǃgôab ǃnâ, ǁnāpa xu gu ge Sebulonni tsî Naftalib hâkha ǂgaeǂgui-aoga ra sao.

²⁸ Elotse ǀgaib âtsa ǁgau re, sa ǀgaib sidats ge huiǂui-ūba,

²⁹ sa Tempeli Jerusalems ǃnâ mâba xu, ǁîb tawa gu gao-aoga ǀkhaexūna ra hā-ūba tsiba.

³⁰ ǁNā ǀgurub ǂāgu ǃnâ ǁan hâba ǂgōǀau re, ǀhûpe hâ ǁgōgu, ǁaes di tsâun ǀkha hâga. ǁNān marib ai ǂâisa ǂnûi hâna dāǂkhū re, ǁnān torodīsa ǀnamna ǀgaruǀgaru re.

³¹ ǂNûǁkhaeba-aogu ge Egipteba xu nî hā; Etiopiab ge ǃomgu âba ǃhaese Elob ǃoa nî ūkhâi.

³² ǃHūbaib di gaosiga Eloba ǁnaeba re, ǃKhūba koaǁnaeba re,

³³ ǁnāb ǀhomgu ǃnâ ra ǃgapiba, tsoatsoasa xu hâ ǀhomgu ǃnâ. ǁÎb ge dommi âba ra ǀō kai, ǁîb di ǀgaisa domma.

³⁴ Elob ǀgaiba ǂanǂan re. ǁKhāsib âb ge Israeli ǂamai hâ tsî ǂkhaisib âba ǀhomgu ǃnâ.

³⁵ ǃHuriǃhurisab ge Eloba hâǃkhais âb ǃnâ, Israels di Eloba. ǁÎb ge ǁaes âba ǀgaib tsî ǁkhāsib tsîkha ra mā. Ab Eloba koahe re!