Psalmdi 66 - Khoekhoegowab 2020

Koa tsî gangantsanas

Davidi Psalms

¹ Dâba re Eloba ǃhūbaits hoatse!

² ǃGôasib ǁîb ǀons diba ǁnaeba re! Anub hâ ǃgôasiba mā bi re.

³ Eloba mîba re: “Mâtikōse gu a ǃaoǃaosa sa sîsenga? Sa ǀgaib di kaisib ǃaroman ge sa khākhoena sa aiǃâ nî ǃhon.

⁴ Hoaraga ǃhūbaib ge ǃhon tsî satsa ra koaǁnaeba, sa ǀonsa ra koaǁnaeba.”

⁵ Hā î Elob sîsenga hā kō re ǁîb ge sîsengu âb ǃnâ a ǃaorosa, khoen ôan ǁaegu.

⁶ Huribab ge ǂnâsa ǃhūb ǃnâ ge ǀkharaǀkhara tsîn ge khoena ǀnūb ǀkha ǃāba ge ǃgûǃgâu. O da ge ǁnāpa ǁîb ǃnâ ge ǃgâiaǂgao.

⁷ ǁÎb ǀgaib ǀkhab ra ǀamose gaosîsen mûra âb ge ǁaede ra ǃûi, în mâǃoaxa khoena tā ǁî-aitsama ǀgapiǀgapisen.

⁸ Sada Eloba koa re ǁaeso ab ǁîb koas di ǀganaba ǁnâuhe.

⁹ ǁNāb sada ûib ǃnâ ra mâib tsî sada ǂaidi nî ǁnobesa ge mā-am tama iba.

¹⁰ Elotse sats ge sida ge ǃâitsâ tsîts ge ǀhaiǀurib khami ge ǃanuǃanu da.

¹¹ Sats ge ǁnoasa ge ǁguiba da tsî ǃgomma ge ǃnao-ai da.

¹² Sats ge khoena sida danadi ai ge ǃgapi kai ǀaes tsî ǁgam-i ǃnâ da ge ge ǃkharu tsîts ge ǃnāǂamsasib ǀkha ge ūǂui da.

¹³ Sa ommi ǃnâ ta ge khauǁguibadi ǀkha nî ǂgâ tsî ti mîmâide nî matare tsi.

¹⁴ Ti amǁgaukha xu ge ǂoaxa mîdi ti ams ge ǂōǂōsib ǃnâ ta hâ hîa ǃhoade.

¹⁵ Kaukausan di khauǁguibade ta ge nî hā-ūba tsi baigu di ǀanǀanǁguibadi ǀkha. Goman tsî pirina ta ge ǀguipa nî ǁguiba.

¹⁶ Hā î du ǃgâ re, Eloba ra ǃaoǃgâdu hoado, î ta tarenab ge tita dība ǃkhaisa mîba du.

¹⁷ Ti ams ǀkha ta ge ǁîba ge ǂgaiǀî, ǁîb di koas ge ti nams ai ge hâ i.

¹⁸ Ti ǂgaob ǃnâ ta ga ǂkhababa ǂâi hâ, ob ge ǃKhūba ga ǃgâ te tama hâ.

¹⁹ Xaweb ge Eloba tita ge ǁnâu; ǁîb ge ti ǀgoresa ge ǁnâu-am.

²⁰ Ab Eloba koahe re, ti ǀgoresa ǂkhā tama tsî ǁîb di hâhâ ra ǀnamma tita xu ūdawa tamaba.