Psalmdi 65 - Khoekhoegowab 2020

Elob ǃgâisib ǃaroma hâ koatsanas

Davidi Psalms

¹ Elotse Sions tawan satsa ra kare tsîs nūsa satsa nî matarehe.

² Sats sida ǀgorede ra ǁnâu-amts ǃoan ge hoaraga khoena nî hā.

³ Sida dīsādi ge ra ǀgaidā da xawets ge sida ǃûǂamde ra ǀûba da.

⁴ ǀKhaehe i ge hâ ǁnā-i, ǁî-ets ra ǁhûi tsî ǀgūǀgū-e î-i sa ai-omgu ǃnâ ǁan ǁkhā. Sida ge sa ommi di ǃgâisib xa nî ǁâ ǃanu ǃkhaib sa Tempeli dib ǀkha.

⁵ Sats ge buruxa dīgu ǀkha ge ǃeream da, Elotse sats hîa sida ra ǃnoraǃnorats, sida di ǂgomǃgâts, ǃhūbaib di ǀams kōse, hurib di ǃnūsib kōse.

⁶ Sats ge sa ǀgaib ǀkha ǃhomga ge ǂnubi; ǀgaib ǀkha anahe hâtsa.

⁷ Huriba ra ǃnōǃnōts; ǃgabigu di ǂkhupib tsî khoen di ǂkhupiba ra ǃnōǃnōtsa.

⁸ Tsîn ge ǁanǂgāsaben ǃnūse ǁan hân tsîna sa buruxa sîsenga ra ǃao. Sats ge sores di ǁhais tsî ǁîs di ǂgâsa ra ǃgâiaǂgao kai.

⁹ Sats ge ǃhūba sari tsî ǃnāǂamsase ra ǃkhū kai Elob di ǃārogu ge ǁgam-i xa ǀoa hâ tsîb ge ǁnā ǀgaus ai ǃhoroba ra aiǂhomi.

¹⁰ ǃHūǃgaohe hâ ābats ge ǃnāǂamsase ǁgam-e ra mā; ǃgaokhâihe hâ ǃhūbats ge ra ǂhauǂhau; ǀnanub ǀkhats ǁîba tsautsau tsî ǃīǂoaxa rana ra ǀkhae.

¹¹ Sats ge kuriba sa ǃgâisib ǀkha ra ǀgapa tsî di ge sa dāǃharode ǁnuiba ra ǂnâ kai.

¹² ǃGaroǃhūb ǃû-aidi ge ra ǂnâ tsî ǃhomgu ge dâb ǀkha anasen hâ.

¹³ ǃÛ-aidi ge gūn xa ǀoa hâ; ǃgoaǃnāgu ǃhorob ǀkha ǃgū-aihe hâ tsîn ge dâb ǀkha ra ǂgaiǂui, ā ǁîn ge ra ǁnae.