Psalmdi 61 - Khoekhoegowab 2020

Sâub ǃaroma hâ ǀgores

Davidi Psalms, ǁapaxa ǀkhōxūn ǀkha

¹ Elotse, ti āsa ǁnâu re; î ti ǀgoresa ǃgaoǃgâ re.

² ǃHūbaib ǀamsa xu ta ge sats ǃoa ra ǂgai; ti ǂgaob ga ǂkhabuo. ǀGapi ǃhaob ǃoa ǂgaeǂgui te re.

³ Sats ge a ti ǁhaiǁhâǃkhai ǀgaisa ǂgō-omts, khākhoeb ǃoagu hâts asets ge ība te.

⁴ A ta ǀamose sa tentommi ǃnâ ǁan re. A ta sa ǁgabogu di sommi ǃnâ sâba hō re.

⁵ Sats ge ti nūsa ge ǁnâu tsîts ge ǁnān sa ǀonsa ra ǃaoǃgâna ǀumis ase ge mā te.

⁶ Gao-aob di ûitsēde ǀaro re, î gu kurigu âba ǃhaosa xu ǃhaos kōse hâ.

⁷ Ab ǀamos kōse Elob trons aiǃâ ǂnû, îb hâhâ ra ǀnammi tsî ǂgomǂgomsasiba ǁîba ǁkhauba.

⁸ Sa ǀonsa ta ge ǀamose nî koaǁnaeba ti nūsa ta ra tsēsa xu tsēs ǁga ûiǂuise.