Psalmdi 58 - Khoekhoegowab 2020

ǂKhaba khoen ǁkharahes ǃaroma hâ ǀgores

Davidi ǀgaipetsanas

¹ Sadu ǀgaiba ūhâdo, amabes ǃnâ du ǂhanu-aisiba ra ǃhoa? ǂHanu-aise du xare ra ǀgoraǃgâ?

² ǂGaogu âdu tsîn ǃnâ du ge ǂhanuoǃnâsiba ra sîsen tsî ǃhūb ǃnâ du ge sadu ǃomgu ǀkha ǂkhababa ra ǀgoraǂui.

³ ǃNaesa xun ge ǂkhaba khoena ǀkhara daoba ra ǃgû, ǁgûs di ǃnāba xun ge ǂhumi-aona ra ǁhapuma.

⁴ ǃGāb ân ge ǀao-i dib khami ī; ǁîn ge ǂganaǂgae hâ ǃgai-i, ǂgaera â-e ra ǂganam-i,

⁵ ǃgaidī-aob di domma mâtikōseb ga ǀhôagao, xawe ǁnâu tama-i khami ī.

⁶ Elotse, ǁîn amǃnâ hâ ǁgûga khôa re; ǃKhūtse, ǂkham xamn di ǁgûga khôa re.

⁷ An ǁgam-i khami dâubē re, an ǁîǁhain, daob ǃnâ hân khami dāǂkhūǂkhūhe.

⁸ ǁKhâxaes khami i ge nî tsunibē, ǁaeb aiǃâ ǃnae hâ ǀgôa-i, noxopa soresa mû tama-i khami.

⁹ ǁKhūhais ǀgamma di nî hōǃâs aiǃâ di ge sadu sūde, ǂhubin ga hâs, oran kas hoasa nî dībēhe.

¹⁰ ǂHanu-ain ge ǀkhaoban ga mû, o nî ǃgâiaǂgao; ǁîn ǂaiden ge ǂkhabadī-aon di ǀaob ǃnâ nî ǁā.

¹¹ Tsîn ge nî mî: “Amaseb ge ǂhanu-aiba mādawa-amsa go hō; Amaseb ge Elob, ǃhūbaib ai ra ǀgoraǃgâba hâ.”