Psalmdi 56 - Khoekhoegowab 2020

Elob ǃnâ ǂgomǃgâsa ūhâs di ǀgores

Filisteǁîn ge Gats tawa ǃkhō bi ǁaeb ǃnâ

¹ ǀKhomxa te re Elotse, khoen ra dāǂkhū te xuige; hoaraga tsēsan ge ǁnān ǃkhamū te rana ra ǁgâiǀā te.

² Ti khākhoen ge hoa tsēsa go dāǂkhū te ǂguin ra ǀgapiǂâixasib ân ǃnâ tita ǃoagu ǃkham xui-ao.

³ ǃAo ta ka tsēs ai ta ge sats ai nî ǂgomaiǂnûi.

⁴ Elob, ǁîb mîsa ta ra koab, ǁnā Eloba ta ge ra ǂgomǃgâ. Khoe-e tare-e nî dī te?

⁵ Hoa tsēsan ge ti mîde ra daba tsî di ge ǁîn di ǂkhaba ǀapede ti ǃoagu hâ.

⁶ ǁÎn ge ǀhûpe gauǁgoe tsî tita ra ǃkhē. Tsîn ti ǃnôara ra ǃûi, ti ûiban ǃâu hâs ao.

⁷ ǂKhabasib ǃnâ ǁîna māǁnâ, î ǁaib ǃnâ ǁîna ǂnauǁgui re Elotse.

⁸ Sats ge aitsama ti ǃgaesende ge ǃgôakhâi; tsîts ge ti ǁgamrona khōxapas ǃnâ ge ǂgā. On kha sa ǂkhanis ǃnâ xoamâisa tama hâ?

⁹ On ge ti khākhoena ǁnā tsēs ai ta ga ǂgaiǂui, o tita xu nî ū-oasen. Nēs, Elob a tisa ta a ǂan xui-ao.

¹⁰ Elob di mîsa ta ge nî koa; ǃKhūbdi mîsa ta ge nî koa.

¹¹ Eloba ta ge ra ǂgomǃgâ. Tare xū-e i khoe-e tita nî dī?

¹² Satsa ta ge dība mîmâide ta ge surude tsi hâ Elotse; tsî ta ge ganganǁguibadi ǀkha nî matare tsi.

¹³ Satsa ti ûiba ǁōba xu ǃnoraǃnora tama hâ tsî ti ǂaira ǃnôa ra nîsa xu? Elob aiǃâ tsî ûib di ǃnâb ǃnâ ta nî ǃgûse.