Psalmdi 54 - Khoekhoegowab 2020

Khākhoen ǃoagu hâ ǁkhaubahes di ǀgores

ǁNaeǃnans ǂgaeǂgui-aob ǃoa: ǁApaxa ǀkhōxūn ǀkha. Davidi Maskils. Sifǁîn ge Sauli ǁga ǃgû tsî “Davida kha sida ǁaegu gau tamab hâ” ti dî ǁaeb ai.

¹ Elotse, sa ǀons ǀkha ore te re î sa ǀgaib ǀkha ti ǁhōba ǂnoaba te re.

² Elotse, ǁnâu re ti ǀgoresa; î ǃgâ ti ams di mîde.

³ ǃHaokhoen ge tita ǂama ge khâi, ǁgauoǃnâ khoen ge ti ûiba ra ôa, ǁnān hîa Eloba ǁîn aiǃâ mâi tamana.

⁴ Mû, Elob ge a ti hui-ao, ǃKhūb ge ti ûiba ǃkhōmâi hâ.

⁵ Ab nē ǂkhabab ti khākhoen ti ǃoagu ra ǀapeba ǁîna mādawa-amhe; ǃKhūb ge ǁîna nî hîkākā, ǂgomǂgomsab a amaga.

⁶ Māsenxase ta ge satsa ra ǁguiba; tsî ta ge sa ǀonsa nî koa, ǃgâits a xui-ao, ǃKhūtse.

⁷ ǁÎb ge tita hoa ǂōǂōsiga xu ge ore tsî ta ge dans ǀkha ti khākhoena ge kō.