Psalmdi 52 - Khoekhoegowab 2020

Elob ǀgoraǃgâs tsî ǀkhommi

ǁNaeǃnans ǂgaeǂgui-aob ǃoa. Davidi di Maskils, Doegi, Edomǁîb ge hā tsî Saula “Davidi ge Ahimelexi oms tawa go hā” ti mîba ǁaeb dis.

¹ Tare-i ǃaromats ǂkhabab xa ra koasen, ǀgaisa khoetse? Elob di hâhâ ra ǀnammi ge hoa tsēsa ra hâ.

² Sa nams ge hîkākāsa ra ǀape ǀāǀāhe hâ gôa-i xase, gāxaǃnâb di sîsenaotse.

³ Sats ge ǂkhababa ǃgâib ǃgâ-ai ǀnam; ǂhumiba, ǂhanu-aisiba ǃhoas ǃgâ-ai.

⁴ Sats ge hîkākā ra mîde ǀnam namts, gāxaǃnâsib ditsa.

⁵ Elob ge ǀamosib kōse nî hîkākā tsi; ǁîb ge satsa tsububē tsî sa tentomsa xu nî ūbē; ǁîb ge ûitsaman di ǃhūba xu nî ǃhomǂui tsi.

⁶ Tsîn ge ǂhanu-ai khoena nēsa mû tsî nî ǃao; tsîn ge satsa âiǂui tsî nî mî:

⁷ “ǁNāb ge khoeb, Eloba ǁîb di ǁhaiǁhâǃkhaise dī tamaba tsîb ge ǁîb di ǃkhūsib di ǃnāǂamsasib ai ra ǂgomaiǂnûi tsîb ge nauna ra hîkākā.”

⁸ Tita ge ǀkherahai-i, Elob ommi ǃnâ ra ǁhao-i khami ī; tita ge Elob di hâhâ ra ǀnammi ai ǀamose ra ǂgomǃgâ.

⁹ ǀAmose ta ge nî gangan tsi dīts gen ǃaroma tsî ta ge sa ǀons ai nî ǃâu, sa ǃanun di ǀgūhâsib ǃnâ hâs a ǃgâi xui-ao.