Psalmdi 51 - Khoekhoegowab 2020

ǀÛbas di ǀgores

Davidi Psalms, kēbo-aob Natanni ge ǁîb tawa, Batsebas ǀkhab ge hâ is khaoǃgâ hā ǁaeb dis

¹ ǀKhomxa te re Elotse, sa hâhâ ra ǀnammi ǃaroma. Sa ǀkhomxaǂgaosib di kaisiba xu ti ǃûǂamde ǀari re.

² Ti tsūdīna xu ǁā te, î ǁorena xu ǃanuǃanu te re.

³ Ti ǃûǂamde ta ge a ǂan tsî ti ǁoreb ge hoaǁae ti aiǃâ hâ.

⁴ Sats ǀguits ǃoagu ta ge ǁore tsî sa mûǁae a ǂkhabana go dī. ǃHoats ka, ots nî ǂhanu-aise, tsîts ǀgoraǃgâs âts ǃnâ nî ǃanuse.

⁵ ǁOreb ǃnâs ge ti îsa ge ǃkhōǃoa te, dīsās ǃnâ ta ge ge ǃnae.

⁶ ǂGomǂgomsasib ge ǃnākhoesib ǃnâts ra ǂgaoba; gā-aisib ge ǂganǃgâsib ǃnâts ra ǁkhāǁkhāba.

⁷ Hisop ǀkha ǃanuǃanu te re, ǁā te re, î ta tsamaros ǃgâ-ai ǃuri.

⁸ ǁNâu kai te re ǃgâiaǂgaob tsî dâb di ǀganaba, î gu ti ǂkhōgu khôaǂkhūts gega dâ.

⁹ Sa aisa ti ǁorena xu gaugau re, îts ti ǁorena ǀariǂui.

¹⁰ ǃAnu ǂgaoba kuruba te re, Elotse, î ǁaposa gagasa ti ǃnākhoesib ǃnâ ǀasaǀasa re.

¹¹ Tā sa aisa xu ǂhābē te re, î sa ǃAnu Gagaba tā tita xu ūbē re.

¹² ǀAsaǀasa re tita ǃnâ sa ores di ǃgâiaǂgaoba, î māsenxa gagas ǀkha ǂkhâǃnâ te re.

¹³ ǃÛǂamaona ta ge sa daoga nî ǁkhāǁkhā tsîn ge ǁore-aona sa ǃoa nî dabasen.

¹⁴ ǀAoǂnâxūsa xu ore te re Elotse, Elots ti ǃgâiǃōsib ditse, os ge ti namsa sa ǂhanu-aisib xa nî dâ.

¹⁵ O ǃKhūtse ti amǁgaukha satsa khowa, os ge ti amsa sa koasa nî ǂhôa.

¹⁶ ǁGuibadets ge tura tama hâ tsî ta ge ǃgâiǃgâibasensats ūhâǃnâ tama khauǁguibade hā-ū tide.

¹⁷ Eloba ūǃoasaba ǁguibadi ge a khôaǂkhūsa gaga; Elotse, khôa tsî ǂkhū hâ ǂgaobats ge ǃharaxū tide.

¹⁸ Sionsa ǃgâidība re Elotse, Jerusalems ǂnubiǂgoaga ǂnubikhâi re.

¹⁹ Ots ge ǂhanu-aisib di ǁguibadi xa nî ǃgâiaǂgao; hoaragase ra ǂhubihe ǁguibadi xa, tsîn ge khoena ǁgōga sa altars ai nî ǁguiba.