Psalmdi 50 - Khoekhoegowab 2020

Ama ǃoabas

Asafi di Psalms

¹ Hoaǀgaixa Elob, ǃKhūb ge ra ǃhoa; hoaraga ǃhūbaibab ge sores ra ǁhaisa xu, ǁîs ra ǂgâs kōse ra ǂgai.

² Sions, îsasib di dīǀoaǀoasasiba xub ge Eloba ge ǁgausen.

³ Sida Elob ge ra hā, tsîb ge ǃnōsa tama hâ; ǀaes ge ǁîb ais ai ra khauǃkhū tsî ǁîb ǂnamipes ge kaise ǀgaisa ǁgaoǂoasa ra ǃgom.

⁴ ǁÎb ge ǀhomma ǀgapiseba xu ra ǂgai, tsî ǃhūbaib ǃoa, ǁîb ǁaesa nî ǀgoraǃgâse.

⁵ Tsîb ge ra mî: “ǀHaoǀhaoba te re tita tawa ti ǂgomǂgomsa khoen, tita ǀkha ǁguibadi ǃnâ-u ǃgaeǀhaosa ge dīna.”

⁶ ǀHomgu ge Elob ǂhanu-aisiba ra ǂhôa, ǁîb ǂûb a ǀgoraǃgâ-aosa.

⁷ “ǃGâ re ti khoedo, î ta ǃhoa; Israelse sa ǃoagu ta ge nî ǀhûǀguitimî. Tita ge a Elo, sa Elota.

⁸ Sa ǁguibadi ǃaroma ta ge ǂgōǀau tsi tama hâ; sa khauǁguibadi ge hoaǁae tita tawa hâ.

⁹ Sa omma xu ta ǁgōga ǃkhōǃoa tide tsî ǁkhāti pirina sa ǃharade xu.

¹⁰ Mâ ǀguru-i tsî xamari-i ǃgarob di-i hoa-i ge a ti; ǀoadisi ǃnâugu ai hâ gomana.

¹¹ Mâ ani-i ǃhomgu di-i hoa-e ta ge ǂan, ǁkhātin ge hoaraga ûitsama kurusabena a ti.

¹² “ǃÂsa ta ka xawe ta satsa mîba tide ǃhūbaib tsî ǁîb ǃnâ hân hoan ge a ti.

¹³ Gomaǁgan-e ta ǁnâi ra ǂû? Pirin di ǀao-e ta ǁnâi ra ā?

¹⁴ Ganganǁguiba-e Eloba ǁguiba, î Hoan xa ǀGapiba sa mîmâide dība.

¹⁵ ǂGaiǀî te re ǂōǂōsib tsēs ai, o ta ge nî huiǂui tsi tsîts ge satsa nî kare te.”

¹⁶ Xaweb ge Eloba eloxoresab ǃoa ra mî: Tare-i ǃaromats ti mîmāde ra ǂanǂan tsîs ti ǃgaeǀhaosa sa ams ai ūhâ?

¹⁷ Sats ge ti ǂgōǀaude ǁkhan hâ; tsîts ge ti mîde sa ǃgâb ai ge aoxu.

¹⁸ ǃNari-ao-ets ga mû, ots ge ǁî-i ǀkha ra ǀhōgu tsîs ra ǃgamekhôa-aon ǀkha amǃnâxa.

¹⁹ Sa amsats ge ǂkhabases nî gowase ra khowa tsî sa namsa ǀhôagao ǁaxasin ǃnâs nî amǃnâxase.

²⁰ Sa ǀaokhoen ǃoaguts ra ǀapeǀhaode dī tsîts sa îs ôa-e ra ǀhapimā.

²¹ Nēn hoanats ge dī, xawe ta ge ge ǃnō tsîts ge sats khami ta ī ti ge ǂâi. Tita ge satsa nî ǁkhara tsî ta ge ǁîsa sa mûǁae nî mâi.

²² Sadu hîa ra Eloba ǀurudo nēsa ǂâis ǃnâ ūhâ re ǁnā tamas ka io, ta ge nî ǀkhauǃā du, hui-ao-i a ǀkhai hîa.

²³ ǁNā-i hîa tita ganganǁguibasa ra mā-i ge tita ǃgôasiba ra mā. Tsî ta ge tita ǁnā-i ǁî-i daob ai ǂâisa ra ǂnûi-e Elob di oresa nî hōǃâ kai.