Psalmdi 5 - Khoekhoegowab 2020

Sâub ǃaroma hâ ǀgores

Davidi Psalms

¹ Ti mîde toxopa ǃgâ re ǃKhūtse; î ti ǀhâimâinǀomsa ǃgâ re.

² Ti ǂgaidomma ǃgâ re ti Gao-ao tsî Elotse, sats ǃoa ta ra ǀgore xuige.

³ ǃKhūtse, ǁgoagats ge ti domma ra ǁnâu; ǁgoaga ǀgore tsî ta ge sa ǃereamsa ra ǃâu.

⁴ Sats ge ǂkhabasib ǃnâ ra ǃgâiǃgâisen Elo tamatsa; ǂkhabab ge sa tawa hâǃkhai-e ūhâ tama hâ.

⁵ ǀGapiǂâixan ge sa mûǁae mâ ǁkhā tide; sats ge ǂkhaba-aon hoana ǁkhan hâ.

⁶ Hoaraga ǂhumi-aona hîkākā tsîts ge ǃgamaon tsî gāxaǃnâ-aona ra ǃharaxū.

⁷ Xawe ta ge sa hâhâ ra ǀnammi ǃaroma sa ommi ǃnâ nî ǂgâxa. Sa ǃanu Tempeli ǃnâ ǃhonǁgoa tsî ta ge ǃgôasib ǃnâ nî ǃoaba tsi.

⁸ ǃKhūtse ti khākhoen ǃaroma sa ǂhanu-aisib ǃnâ ǂgaeǂgui te re; î sa daoba ǂhauǂhauba te re.

⁹ ǁÎna xu i ge ama-e ǂoaxa tama hâ; tsî ǂgaob ân ge hîkākās xa ǀoa hâ. ǁÎn di domgu ge a ǁkhowa-amsa ǀhoba tsî nams ân ge a ǃgāxa.

¹⁰ An ǁîn di ǀhapisa tani re Elotse; în ǁîn di ǂhunuma ǀapedi ǃnâ ǁnā. ǁÎn di ǂgui ǁoren ǃaroma ǁîna saurubē sats ǃoagun ra khâikhâisen xuige.

¹¹ Xawen ge hoan hîa sats ǃoa ra ǁhaiǁhâna, dâxase ǁnae tsî nî ǃgâiaǂgao. ǁNān hîa ǀnam tsina sâu, în sa ǀons ǃnâ ǃgâiaǂgao re.

¹² ǃKhūtse sats ge ǂhanu-aina ra ǀkhae tsîb ge sa ǀnamma ǁîna ǁkhaukhōs ǀkhas khami ra sâu.