Psalmdi 46 - Khoekhoegowab 2020

Elob ge hâǀkhā da

ǁNaeǃnans ǂgaeǂgui-aob ǃoa. Koraxi ôagu di Psalms. Alamot ǃoa. ǁNaetsanas

¹ Elob ge sida ǁhaiǁhâǃkhai tsî a sida ǀgai, ama hâ a hui-aoba, ǃgomgu ǁaeb ǃnâ.

² ǁNā-amaga da ge ǃao tide ǃhūbaib ga ǀkhara xawe; ǃhomgu ga hurib ǃgamsib kōse ǀkharaǀkharahe xawe.

³ ǁGamgu ǁîb digu ga ǀō tsî goa tsî ǃhomga ǀkhū ǁîb di ǁgaos xa xawe.

⁴ ǁNāpab ge ǃāb, ǁîb di dâudi ra Elob ǃāsa ǂkhî kaiba hâ; Hoan xa ǀGapib di ǃanu ǁanǃkhaisa.

⁵ Elob ge ǁnā ǃās ǃnâ hâ, tsîs ge ǁnobe tide, Elob ge ǁîsa ǃnauǁgoaga nî hui.

⁶ ǁAedi ge ra khâikhâisen, gaosigu ra ǁnobe; ǁîb ge ra gowa, tsîb ge ǃhūbaiba ra tsuni.

⁷ ǃKhūb Hoaǀgaixab ge hâǀkhā da; Jakob Elob ge a sida di ǁhaiǁhâǃkhai.

⁸ Hā, î ǃKhūb di sîsenga hā mû re, ǁnāb ǃhūbaib ai tsūǀkhāga ra hā-ūba.

⁹ ǁÎb ge toroga hoaraga ǃhūbaib ai ǀû kai, khāsa khôa tsî gôaba ǀgam ǃâra ǃnâ khôa tsî torokunide ǀaes ǀkha ra khauǂui.

¹⁰ ǀÛ, î ǂan re tita a Elo ǃkhaisa; ǁaedi ǁaegu ta ge nî ǀgapiǀgapihe, ǃhūbaib ai ta ge nî ǀgapiǀgapihe.

¹¹ ǃKhūb Hoaǀgaixab ge hâǀkhā da Jakob Elob ge a sida di ǁhaiǁhâǃkhai.