Psalmdi 44 - Khoekhoegowab 2020

Sâuhes ǃaroma hâ ǀgores

ǁNaeǃnans ǂgaeǂgui-aob ǃoa. Koraxi ôagu di Maskils.

¹ Elotse, sida ǂgaedi ǀkha da ge ge ǁnâu, sida aboxan ge sida ge ǁgamba. ǁÎn di tsēdi ǃnâ, ǃkharu ge tsēdi ǃnâts gere satsa dī xūna.

² Sa ǀgaib ǀkhats ge ǃhaode doeǁgaǂui tsî sida aboxaga ge ǃhana. Khoena ǂkhūǂkhū tsîts ge ǁîga ge ǃnora kai.

³ Gôab ǀkha tamas ge ǃhūba gu ge ūbasensa, tsî ǁôab âgu ge ǁîga dansa mā tama hâ. Sa amǀkhāb ǃommi tsî ǁôab, tsî sa ais di ǃnâb ge ǁnāsa ge dī. ǁÎn ǃnâts ge ǃgâiǃgâibasensa ge ūhâ i.

⁴ Sats ge a ti gao-ao, Elotse mā re Jakoba dansa.

⁵ Sa ǀgaiba xu da ge sida khākhoena ge dan. Sa ǀons ǀgaiba xu da ge sida ǃgôaǃgonaona ge dāǂkhū.

⁶ Ti khās ai ta ge ǂgomǃgâ tama hâ tsî ti gôab ge dansa mā te tama hâ.

⁷ Sats ge sida dansa ge mā, sida khākhoen ǂama tsîts ge ǁnān sida ǁkhan hâna ge taotao.

⁸ Hoaraga tsēsa da ge Elob xa ra koasen tsî da ge sa ǀonsa ǀamos kōse nî kare.

⁹ Sats ge sida ǂhara tsî ge ǃgamǃgam tsîts ge sida toroǃkhamaon ǀkha ǃgûǂoa tama hâ.

¹⁰ Sats ge sida khākhoena xu ge oa kai da tsîn ge sida di ge ina ge ūbasen.

¹¹ Gūn khamits ge ǂû-i ase ge māǁnâ da tsîts ge ǃhaodi ǁaegu ge ǀgaruǀgaru da.

¹² Kai marib ǃaroma tamats ge sa khoena ge ǁamaxū, ǁkhāsi-e ūhâ taman xase.

¹³ Sida ǁanǁare-aon di ǃhōxūsets ge ge dī da tsîn ge ǁîna sida ǃhō tsî ra âiǂui.

¹⁴ Sats ge sida ǂkhoamîse ǁaedi ǁaegu ge dī, ǃnabendanaxūse khoen ǃnâ.

¹⁵ Hoa tsēsab ge ti taoba ti aiǃâ hâ; taosib ge ti aisa ra ǃgū-ai.

¹⁶ ǁNāb ǃhō rab tsî ǁnāb ǃkhāǃkhā rab di dommi ǃaroma tsî khākhoeb tsî ǀkhao-aob di mûs ǃaroma.

¹⁷ Nē xūn hoan ge sida ǀkha ge ī, xawe da ge ǀuru tsi tama i tsî ǁkhāti sa ǃgaeǀhaosa ǂkhabase sîsenū tama ge i.

¹⁸ Sida ǂgaogu ge khaosǀî oa tama hâ tsî di ge sida ǂaide sa daoba xu ǁgôa tama hâ.

¹⁹ Xawets ge satsa sida ǀgirin ǃās ǃnâ ǂkhūǂkhū tsî ǃkhaenasa sida ǂama ge hā-ū.

²⁰ Sida Elob ǀonsa da ga ǀuru hâ tsî sida ǃomga ǃhao elo-i ǃoa ǀhōǂui,

²¹ o Eloba ǁnāsa ǂanǂuib tide? Sida ǂgaogu ǃgamsibab a ǂan xui-ao.

²² Sats ǃaroma da ge hoa tsēsa ra ǃgamhe tsî da ge ǂāgūn ase ǃgôahe hâ.

²³ ǃNoaǂkhai re, tarexats ra ǁom ǃKhūtse? ǃNoaǂkhai, î tā ǀamosib kōse ǂhara da re.

²⁴ Tare-i ǃaromats ais âtsa sida xu ra gaugau? Tare-i ǃaromats kha sida di tsâb tsî ǁgâiǀāba nî ǀuru.

²⁵ Tsarab kōse di ge sida ǀomde ge ǃgamǃgamhe, tsîb ge sida ǃnāba ǃhūb ai ra ǂae.

²⁶ Khâi, î hui da re, sa hâhâ ra ǀnammi ǃaroma.