Psalmdi 42 - Khoekhoegowab 2020

ǀGamǁî ǂkhanis Psalmdi 42—72 ǃHūsabe-i di ǀgores

ǁNaeǃnans ǂgaeǂgui-aob ǃoa. Koraxi ôagu di Maskils

¹ ǁGû-i ra ǁgam-e ǁkhore khamis ge ti hoaraga sorosa satsa ra ǁkhore, Elotse.

² Sats ûitsama Elotsa ta ge ra ǁkhore. Mâǁae ta Elob aisa sī nî mû?

³ Ti ǁgamrogu ge a ti ǂû, tsēs tsî tsuxuba, khoen ga ǀûs ose tita ǃoa “Sa Eloba mâpa hâ?” ti mîo.

⁴ Nē xūna ta ge nî ǂâi, ti ǂgaoba ta ga ǃhoaǂuio: Mâti ta ǂnubis ǀkha gere ǃgûsa, ǁîna Elob ommi ǃoa ra ǂgaeǂguise; ǃgâiaǂgaob tsî gangantsanade ra ǁnaese, ǁâudī ra ǂnubis ǀkha.

⁵ Tarexas kha ǃoa hâ ti ǀomse? Tarexas a sâoǃnâ? Elob ai ǂgomaiǂnûi re, ǁîba ta ge nî koa, huib âb ǃaroma.

⁶ Ti Elotse tita ge ǃgamǃgâ hâ, ǁnā-amaga ta ge Jordanni ǃhūb ǃnâ nî ǂâihō tsi; Hermonǃhomma xu, Misarǃhomma xu.

⁷ ǁGammidâus ge dâus ǃoa ra ǂgai, sa ǁgamǁnādi di ǀōb ǃoa. Hoaraga ǃgabigu âts tsî heradi âts ge ra īǂam te.

⁸ Tsēab ge ǃKhūba ǁîb di hâhâ ra ǀnamma ra ǁgau tsîb ge tsuxuba ǁnaetsanasa ra mā te, ǀgores, ti ûib di Elob ǃoa hâsa.

⁹ Elob, ti ǃgareǀuib ǃoa ta ge ra mî: “Tare-i ǃaromats ǀuru te hâ? Tare-i ǃaroma ta ǃoab ǃnâ nî ǃgûma, khākhoeb xa ra ǁgâiǀāhese?”

¹⁰ Ti ǂkhōgu ǃnâ ta ge ra ǀkhū, ti khākhoen ga tita hoaraga tsēsa ǃhō tsî mîo: “Sa Eloba mâpa hâ?”

¹¹ Tarexas kha ǃoa hâ ti ǀomse? Tarexas a sâoǃnâ? Elob ai ta ge nî ǂgomaiǂnûi, ǁkhawa ta ge ǁîba nî koa, ti hui-ao tsî ti Eloba.