Psalmdi 40 - Khoekhoegowab 2020

Koaǁnaetsanas

Davidi Psalms

¹ ǃKhūba ta ge ǂomxase ge ǃâu, ob ge ǁîba tiǀî ǂnan tsî ti ǂgaisa ge ǁnâu.

² ǁÎb ge tita tsausa xu, ǂgoaba xu ūǂui tsî ǁaposa ǃhaob ai ge mâ kai.

³ Ti amǃnâb ge ǀasa ǁnaetsanasa ǂgā, Elob ǃoa hâ karetsanasa. ǂGuin nî mû tsî ǃao tsî ǂgomǃgâs âna ǃKhūb ai mâi.

⁴ ǀKhaehe-i ge hâ ǁnā khoe-i ǃKhūb ai ra ǂgomaiǂnûi-i, ǀgapiǂâixanǀî kō tama-i tsî ǁgôa-elona ǃoaba tama-e.

⁵ ǂGui xūnats ge ge dī, ti ǃKhū tsî Elotse. Sats sida ǀapeǁguiba hân ge khoe-i xare-i xa a ǀgopeǀnōhe ǁoa. Tita ge ǂanǂan tsî nî ǃhoa ǃgôas ǃaroman a ǂgui ǃkhaisa.

⁶ ǁGuibadi tsî ǂāǁguibadets ge tura tama hâ, xawets ge ti ǁnâuǃāba ge ǁkhowa-am; khauǁguibadi tsî ǁoreǁguibadi, ǁîdets ge satsa ǂgao tama hâ.

⁷ O ta ge ge mî: “Nē ta ge hâ, hā ta ge go; tita xas ge ǂkhanis ǃnâ xoahe hâsa.

⁸ Sa ǂâisa ta nî dīse ti Elotse, sa ǂhanub ge ti ǂgaob ai hâ.”

⁹ Kai ǀhaos ǃnâ ta ge ǂhanu-aisiba ra aoǁnâ; ǃKhūtse sats ge a ǂan ti amǁgaukha ta ǂganam tama ǃkhaisa.

¹⁰ Sa ǂhanu-aisiba ta ge ti ǂgaob ǃnâ gaugau tama hâ; sa ǂgomǂgomsasib tsî ores xa ta ge ra ǃhoa. Sa hâhâ ra ǀnammi tsî ǂgomǂgomsasib tsîna ta ge kai ǀhaosa xu gaugau tama hâ.

¹¹ Tā sa ǀkhomxaǂgaosiba tita xu ūbē re ǃKhūtse; ab sa hâhâ ra ǀnammi tsî ǂgomǂgomsasib tsîna hoaǁae sâu te re.

Huib ǃaroma hâ ǀgores

¹² ǃGôaheǁoasa ǃgomsigu ge tita ǃnamiǂgā hâ ti ǃûǂamdi ge ǃkhōǃnami te hâ tsî ta ge a mû ǁoa. ǁÎdi ge ti danaǀûn xa a ǃnāsa tsîb ge ti ǂgaoba ra ǁnāxū te.

¹³ ǃKhūtse, ǁnātikōse ǃgâi î ore te re; ǃKhūtse ǃhaese hā, î hui te re.

¹⁴ An hoan hîa tita ǃgam nîse ra ôana ū-oahe tsî taotaohe în ǁnān hîa ti ǁnāǁgôasa ra turan hoana taob ǀkha ūdawahe.

¹⁵ An ǁnān hîa tita ǃoa “Aha, aha!” ti ra mîna taotaohe.

¹⁶ Xawe an hoan hîa satsa ra ôana sats ǃnâ ǃgâiaǂgao tsî dâ. An ǁnān hîa sa oresa ǀnamna hoaǁae “Ab ǃKhūba ǃgôahe” ti mî.

¹⁷ Tita ge ǀgâsa tsî ǂhâb ǃnâ hâ ab ǃKhūba tita xa ǂâi re. Sats ge ti hui tsî ore-ao ti Elotse, tā ǀhabe re.