Psalmdi 39 - Khoekhoegowab 2020

Tsâ ra khoe-i di ǁguiǁnâs

Davidi Psalms

¹ Tita ge ge mî: “Ti daoga ǃûi; tsî ta ge ti namsa ǁoreba xu nî ū-oa; ti amsa ta ge ǂkhabab ǁaegu ta hâs kōse tomsa nî ǂgā-amǃnâ.”

² ǃGome tsî ta ge ge ǃnō; ǃgâi xū-i tsîna ta ǃhoa tidese xaweb ge ti tsûba ge ǀarosen.

³ Ti ǂgaob ge ge ǀgam tsî ǂâiǂâisen ta rases ge ǀaesa gere ǂhubi o ta ge ti nammi ǀkha ge gowa:

⁴ “ǃKhūtse, ti ûib di ǀams, tsî mâtikōdi a ti ûitsēde ǃkhaisa ǁgau te re; ǂan kai te re mâtib ti ûiba ra ǃgû-īsa.”

⁵ Sats ge ti tsēde ǃommi ǂhabab kōse ge mâi tsî gu ge ti kuriga sats aiǃâ a ǁau. Khoen hoan ge sa aiǃâ ǀommi khami ī.

⁶ Khoe-i ge som-i khami ra ǃgûma tsîn ge xū-i ama tama ra ǀhupu. ǃKhūsiban ge ra ǀhaoǀhao, tari-i nî ū ǃkhais tsîna ǀūse.

⁷ O tare-e ǁnâi nēsisa ǃKhūtse, ǁî-e ta ra ôa-e? Ti ǃâubasens ge sats ǃnâ hâ.

⁸ Ti ǃûǂamdi hoade xu sâu te re; î tā gân di ǃhōxūse dī te.

⁹ ǃGome ta go; ti amsa ta ge khoba tide sats go nēsa ti ai hā-ū amaga.

¹⁰ Sa tsûtsû-aide tita xu ūbē re; sa ǃommi di ǁaixasib xa ta ge toa hâ.

¹¹ Sats ge khoesiba ǁoren ǃaroma ra ǁkhara; ǃkhūsib ǁîn dibats ge ǁgurib khami ra hapu; amaseb ge khoesib hoaba sa aiǃâ ǀommi khami ī.

¹² Ti ǀgoresa ǁnâu re ǃKhūtse, ti ās huib ǃaroma hâsa ǃgâ re; tā sa ǂgaesa ǂgan re ti āsa xu. Sats ǀkha ta ǃhaokhoe-i khami ra ǁan ǃhaokhoese, ti aboxagu hoagu khami.

¹³ Tita xu kōbē re kā ta nîs aiǃâ ta nî ǃgâiaǂgao ǁkhāse.