Psalmdi 35 - Khoekhoegowab 2020

Ti ǃgomǀgausa ûiba sâu

Davidi Psalms

¹ Ti mâǃoasaben ǀkha ǂnoagu re ǃKhūtse, î tita ra ǃkhamūn ǀkha ǃkham re.

² ǁKhaukhōs tsî ǁkhau-ūdas tsîra ūkhâi khâi îts hui te re.

³ Îts ǁhâigôab tsî sommi tsîkha ǂgaeǂui tsî ǁnān tita ra ǃgôaǃgonna ǃgûǃoa tsî “Tita ge a sa ore” ti tita ǃoa mî re.

⁴ An ǁnān ti ûiba ra ôana taotaohe an ǃgamhe în mâ-oa. An taotaohe ǁnān, titan nî ǂkhôadīse ra ǀapena.

⁵ An ǀhōb, ǂoab xa ra doeǁgāheb khami ī îb ǃKhūb ǀhomǃgāba ǁîna sauru.

⁶ Ab daob âna ǃkhae tsî ǂgoaxa îb ǃKhūb di ǀhomǃgāba ǁîna ǃgôaǃgon.

⁷ ǃAromaoǃnâsen ge tita xu ǁîn ǁnoas di tsausa ge gaugau ǁausen ge tita ā-e ge khaoba.

⁸ As hîkākāsa ǁîb ai ǀūb a hîa hā re, îs ǁîb di ǀûis hîab gaugau hâsa ǁîba ǂhao hîkākās ǃnâ, îb ǁîs ǃnâ ǁnā.

⁹ O ta ge tita ǃKhūb ǃnâ dâ tsî ores âb ǃnâ nî ǃgâiaǂgao.

¹⁰ On ge ti hoaraga ǂkhōna nî mî: O ǃKhūtse tari-e sats khami ī-e? ǀKhomǀkhomsa khoe-e ǀgaisa-e xu ore tsî ǀgâsa tsî ǂhâb ǃnâ hâ-e xu ra ǃnariba.

¹¹ ǂKhaba ǀhûǀguitimî-aon ge ra khâi tsîn ge ǀū ta a xūna ra dî te.

¹² ǃGâib ǃās ǃnân ge ǂkhababa ra mādawa-am te tsîs ge ǁî-aitsama ǃoa-aisensa a ti.

¹³ Xawe ta ge tita ǁîn ge ǀaesen hâ io ǀhaosarana ǂgaeǂgā tsî ǂûtama hâ tsî ǃgamǃgâ hâse ge ǀgore;

¹⁴ ǃgâsa-i tamas ka io ǀhōsa-i ǃaromas khami ta ge ra a; ǁî-i di îsa ra ǃoaba-i khami ta ge ra ǃgûma ǃgamǃgâ hâse, ǃoab ǀkha.

¹⁵ Ti ǃnôas xan ge ra dâ tsîn ge tita ra ǀhaoǂam. Tita ganupe ǂan taman ge tita ra ǀkhauǃā tsî toa tama hâ.

¹⁶ Eloxoresasen ge tita ǀûs ose ra ǃhō tsî tiǀî ra ǁaninǁgû.

¹⁷ ǃKhūtse mâtikōsets kha nî mûǃhara? ǁÎn di hîkākāsa xu ore te re; ti ûiba xamgu amǃnâga xu ore re!

¹⁸ O ta ge sa kai ǀhûhâsib ǃnâ nî gangan tsi ǀhomab ǃnâ ta ge koasa nî mā tsi.

¹⁹ An ti khākhoena tā ti ǂama ǃgâiaǂgao ǂhanu tamase ti khākhoese īna. În ǁnān ǃaromaoǃnâse tita ǃhuisana tā mûde ǂgambagu.

²⁰ ǁÎn ge ǂkhîba gowa tama hâ xawen ǁnān ǂkhîse ǁan hân ǃoagu ǂkhabase ra gowa.

²¹ Tsîn ge tiǀî ra ǂkhupi “Sida mûdi ǀkha da ge mû” ti.

²² Xawe sats ǃKhūts ge go mû xuige tā ǃnō re, î tā tita xu ǃnū re ǃKhūtse.

²³ ǃNoaǂkhai î khâimâ re ti ǀgoraǃgâs ǃoa ti ǃKhū tsî Elotse tita ǃaroma.

²⁴ Sa ǂhanu-aisib ǀkha ǂhanu-ai kai te în tā ti ǂama ǃgâiaǂgao re.

²⁵ În ǂgaogu ân ǃnâ tā “ǁNāti ta ge ge ǂhâba hâ i” ti mî. În tā “ǁÎba da ge go hara” ti mî ǁkhā.

²⁶ An tao, în taotaohe hoatsama ǁnān ti tsūǃōb ǃnâ ra ǃgâiaǂgaona. An taob tsî ǃgôaosib ǀkha anahe ǁnān tita ra ǂnûiǁnâna.

²⁷ An ǁnān ti ǃnoraǃnorahesa ra mû ǂgaona ǃgâiaǂgao tsî dâ; În hoaǁae “ǃKhūb ge a kai! ǁÎb ǃgāb di ǂkhîba tura hâba” ti mî.

²⁸ Sa ǂhanu-aisiba ta ge nî ǂhôa tsî ǀûs ose satsa koa.