Psalmdi 34 - Khoekhoegowab 2020

Tsâtsâ, î mû ǃKhūb a ǃgâi ǃkhaisa

Davidi Psalms

¹ Mâ ǁaeb hoab ai ta ge ǃKhūba nî kare; hugaǀguis ge ǁîb koasa ti amǃnâ nî hâ.

² ǃKhūb ǃnâ ta ge nî koasen an ǁnān ǃgamǃgamsen hâna ǁnâu tsî ǃgâiaǂgao re.

³ Tita ǀkha ǃKhūba kaikai re a da ǀhû hâse ǁîba ǀgapiǀgapi.

⁴ ǃKhūba ta ge ge ôa tsîb ge ǁîba ge ǃeream te; tsîb ge hoaraga ǃaob tiba xu ge ore te.

⁵ ǁÎb ra kō khoen ge ra ǀkhâu-aihe tsî di ge aidi âna tātsē tao tama hâ.

⁶ Nē ǀkhomǀkhomsab ge ǂgai, tsîb ge ǃKhūba ǁnâu-am bi; tsî ǁîba hoa ǃgomsina xu ge ǃnoraǃnora.

⁷ ǃKhūb di ǀhomǃgāb ge ǁnān ǁîba ra ǃaoǃgâna hâǂnami; tsî ǁîna ra ore.

⁸ Tsâtsâ î mû ǃKhūb a ǃgâi ǃkhaisa! ǀKhaeheb ge hâ ǁnā khoeb ǁîb ai ra ǂgomaiǂnûiba.

⁹ ǃKhūba ǃao re, sadu ǃanudo! ǁNān ǁîba ra ǃaoǃgân ǃnubusi-i xare-e ūhâ tama xui-ao.

¹⁰ ǂKham xamn ge ǂhâba tsî raǃâ; xawe ǁnān ǃKhūba ra ôan ge xū-i xare-e ǂhaba tide.

¹¹ Hā re ǀgôado, tita ǃgâ re; tita ge ǃKhūba di ǃaosa nî ǁkhāǁkhā.

¹² Tari-e hâ ûiba ra tura-i; ǃgâi tsēde ra mûǃnâ ǂgao-e? -

¹³ Sa amsa ǂkhababa xu ū-oa tsî sa amǁgaukha ǂhumiba gowasa xu.

¹⁴ ǂKhababa xu bē, î ǃgâise dī; ǂkhîba ôa, î ǁîba sauruǃgon.

¹⁵ ǃKhūb di mûra ge ǂhanu-ai khoen ai hâ; Tsî ǂgaera âba ǁîn di ǃgaes ǃoa.

¹⁶ ǃKhūb di ais ge ǂkhabadī-aon ǃoagu hâ ǁîn xa ǃhūbaib ai hâ ǂâiǂâisensab nî ǀariǂuise.

¹⁷ ǂHanu-ain ga ǃgae ob ge ǃKhūba ra ǁnâu tsî ǁîna ǂhansendi âna xu ra ǃnoraǃnora.

¹⁸ ǃKhūb ge ǁnān ǂgaogu ân khôaǂkhūsan ǀgūse hâ; tsîb ge gagadi ân ǂkhū hâna ra ore.

¹⁹ ǂHanu-ai khoen di tsûgu ge a ǂgui xaweb ge ǃKhūba ǁîna hoana xu ra ǃnoraǃnora;

²⁰ ǁîn di hoaraga ǂkhōnab ge ǃKhūba ra sâu tsî i ge ǀgui-i xare-e khôa tama hâ.

²¹ ǂKhabab ge eloxoresa-e nî ǃgam; tsî ǁnān hîa ǂhanu-ai-e ǁkhan hân ge nî ǁkharahe.

²² ǃKhūb ge ǁîb ǃgān di ûiga ra ore; tsîn ge ǁîb ǃoa ra ǁhaiǁhâna ǀgoraǃgâhe tide.