Psalmdi 32 - Khoekhoegowab 2020

ǀKhaehe-i ge hâ ǀûbahe hâ-e

Maskils*

¹ ǀKhaehe-i ge hâ ǃûǂamdi â-e ǀûbahe hâ-e, ǁoren â-e ǃgū-aibahe hâ-e.

² ǀKhaehe-i ge hâ ǃKhūb ǂkhaban â-e ǃgôaba tama-i, ǁî-i gagas ǃnâ i gāxaǃnâsi-e ǀkhai-e.

³ ǃNō ta ge, o gu ge ti ǂkhōga ge toa hoaraga tsēsa tsûb xa ǃgaes xa.

⁴ Tsēs tsî tsuxuba ge sa ǃomma tita ai ge hâ i tsîb ge ti ǀgaiba ǁkhunab di ǀgammi ǃnâs khami ge ǂnâ.

⁵ Ti ǁorena ta ge ge ǂanǂan tsi tsî ti ǂkhabana gaugau tama ge i. Tsî ta ge ge mî: “Ti ǃûǂamde ta ge ǃKhūb aiǃâ nî ǁguiǁnâ;” tsîts ge ti ǂkhawab tsî ǁoreba ge ǀûba te.

⁶ ǁNā-amaga a-i mâ ǂgomsabe-i hoa-e saǀî ǀgore, hō tsi ǁkhā-i a ǁaeb ai. Kai ǁgamgu ge dâu gu ka, xawe ǁî-e tsâǀkhā tide.

⁷ Sats ge a ti gauǃkhai, sats ge tita ǂōǂōsiba xu nî sâu tsîb ge ores di ǃgâiaǂgaoba ti ǂnamipe nî hâ.

⁸ Tita ge ǁgauǃnâ tsî nî ǁkhāǁkhā du daob, ǁîb ǃnâ du nî ǃgûba. Tita ge ǁnās ǃoa nî ǀapemā du tsîs ge ti mûsa sadu ai nî hâ.

⁹ Tā hā-i tamas ka io muli-i ǁnâuǃā-e ūhâ tama-i, toms ǀkha iga ǃkhōǀgarahe tama i, o sa ǀgūse sī tide-i khami ī re.

¹⁰ ǂGuin di ǃoab ge ǁnān hîa a ǂkhabana xu hâ tsî ǃKhūb ai ra ǂgomaiǂnûin ge ǁîb di hâhâ ra ǀnammi xa ra ǃnamiǂgāhe.

¹¹ ǃGâiaǂgao re ǃKhūb ǃnâ sadu ǂhanu-aido, î dâ re sadu ǂhauǃnâ ǂgaoga ūhâdo!