Psalmdi 30 - Khoekhoegowab 2020

Ganganǀgores

Davidi Psalms

¹ Koa tsi ta ge ra ǃKhūtse, sâu te tsîts ge ti khākhoena tita ǂaman ra ǃgâiaǂgao ǃkhaisa xu sâus ǃaroma.

² Ti ǃKhū tsî Elotse, huib ǃaroma ta ge saǀî ā ots ge ǂgauǂgau te.

³ Tsî ǁŌhân Hâǃkhaib xu tita ge sâu. ǀHobas ǁga ta ǁgona garu hîats ge tita ge ûi-ûi.

⁴ ǁNaeba re ǃKhūba sadu ǁîb di ǂgomǂgomsado, î du ǁîb ǃanusib ǃaroma gangansa mā.

⁵ ǁAib âb ge ǁaerob ǀguiba ra hâ, xawe ǃgâisib âba ǀamose. Tsuxuba gu ge ǁgamroga ǂnâ ǁkhā xawe ǁgoagab ge ǃgâiaǂgaoba ra hā.

⁶ Ti ǃnōsasib ǃnâ ta ge “Tātsēs tsîna ta ge tita danhe tide” ti ge mî.

⁷ ǃKhūtse sats ge ti ǃoagu ǃgâise dī tsî ǃhom-i ǃnâ hâ sâuǃkhai-i ǃnâs khami ge sâu te. Xawets ge ais âtsa tita xu ge gaugau tsî ta ge ge ǃao.

⁸ Saǀî ta ge ge ǂgai ǃKhūtse; ǃKhūb ǃoa ta ge huib ǃaroma ge ā.

⁹ “Tarebe harebesa ti ǁōb ǃnâ hâ ǀhobas ǃoa ta ga ǁgôao? ǁŌ hâna kare tsi ǁkhān a? Sa hâhâ ra ǃgâisib xa aoǁnâ ǁkhān a?

¹⁰ ǃKhūtse ǁnâu î ǀkhomxa te re; Satsa ti hui-aose ī re ǃKhūtse!”

¹¹ Sats ge ti ǃoaba ǂnāb ǃnâ ge ǀkharaǀkhara; ǀhaosaraba ūbē tsîts ge ǃgâiaǂgaob saraba ge ǂgaeǂgā te.

¹² Îs ti ǀomsa sa ǂkhaisib xa ǁnae tsî tā ǃnō, ǃKhū tsî ti Elotse, ǀamos kōse ta ge satsa nî gangan.