Psalmdi 26 - Khoekhoegowab 2020

Ti ǂhanu-aisib xa ǂâi re

Davidi Psalms

¹ ǂHanu-aise ǀgoraǃgâ te re ǃKhūtse; ǀhapio ûiba ûi tsî ta ge ǁnobe tamase ǃKhūba ǂgomaiǂnûi xuige.

² ǃÂitsâ î ôaǃnâ te re ti ǂgaob tsî ǃnaira tsîna ǃâitsâ re.

³ Sa hâhâ ra ǀnammi ti aiǃâ hâ tsî ta sa amab ǃnâ ra ûi xuige.

⁴ ǂKhaba khoen ǀkha ta ǀguipa ǂnû tama tsî ǀhôagao khoen ǀkha ǀguipa ǃgû tama hâ.

⁵ ǂKhabadī-aon ǀkha ǀguipa hâsa ta ǁkhan hâ tsî ta ǂkhaban ǀkha ǂnû tide.

⁶ Ti ǃomra ta ǀhapiosib ǃnâ ǁā tsî sa altarsa ra ǃgûǂnami ǃKhūtse.

⁷ Gangantsanasa ǃgari dommi ǀkha ǁnae tsî sa buruxa sîsengu xa ra ǃkhō-amse.

⁸ ǃKhūtse, sa ommi di ǁanǃkhais, sa ǂkhaisib ǁanǃkhaisa ta ge a ǀnam.

⁹ Tā ǁore-aon ǀkha ūbē te re; ti ûiba ǃgamaon diba xu ūbē re.

¹⁰ ǃOmdi ân ǃnâb ǂkhababa hân, tsîb amǀkhāb ǃommi âna ǁamaǃkhunis xa ǀoa hâna.

¹¹ Xawe tita ge ti ǂhanu-aisib ǃnâ ra ûi xuige ore î ǀkhomxa te re.

¹² Ti ǂais ge ǂhauǂhausa ǃkhaib ai mâ tsî ta ge tita ǀhaohâb ǃnâ ǃKhūba nî koa.