Psalmdi 22 - Khoekhoegowab 2020

Ti Elotse, ti Elotse, tare-i ǃaromats kha go ǁnāxū te?

Davidi Psalms

¹ Ti Elotse, ti Elotse, tare-i ǃaromats kha go ǁnāxū te? Tare-i ǃaromats nētikōse tita ǃnora kaisa xu a ǃnū?

² Tsēa ta ge satsa ra ǂgaiǀî, ti Elotse xawets ge ǃeream te tama hâ; Hoaraga tsuxuba ta ra ǂgai xawe ta ge sâ-e ūhâ tama.

³ Tsîts kom satsa ǃAnuts, Israeli xa ra koahets ase ra ǃgapaǀîheo.

⁴ Sida aboxan ge satsa ge ǂgomǃgâ; ǁîn ge satsa ge ǂgomǃgâ tsîts ge ǁîna ge huiǂui.

⁵ Satsa ǂgaiǀî tsîn ge ǃaorosasiga xu ge ûiǂoa; satsa ǂgomǃgâ tsîn ge ǃan kaihe tama ge i.

⁶ Tita ge a ǂuni tsî ta khoe tama; khoesib di ǃharaxū tsî ta khoen xa ra ǃharaxūhe.

⁷ Mû te ran hoan ge ra ǃhō te, tsoranam tsî âiǂui te tsî ra ǃnabindana.

⁸ Tsîn ge “Sats kom ǃKhūb ai ra ǂgomaiǂnûio tare-i ǃaromab sâu tsi tama hâ? ǀNam tsib kao, tare-i ǃaromab hui tsi tama hâ?” ti ra mî.

⁹ Sats kom ǃnaes ǃnâ-u ge ǃnorasase hā-ū tetsao, tsîts kom ǂkhari ǀgôarota ase ǃnorasase ge sâu teo.

¹⁰ ǃNae ta ge tsēsa xu ta ge sats ai ǂgomaiǂnûi hâ ti îs ǃnâ ta hâsa xuts ge a ti Elo.

¹¹ Tā tita xu ǃnū re ǂōǂōsib a ǀgū tsî i hui nî khoe-e a ǀkhai xuige.

¹² ǂGui khākhoen ge ǁgōgu khami xāǂgā te tsî mâǂnami te hâ. ǁAixa ǁgōgu, Basanni digu khamin ge xāǂgā te hâ.

¹³ Xamgu, tita nî ǀkhauǃā gu khami gu ge amǃnâgu âga ge ǁkhowa-am.

¹⁴ Ti ǀgaib ge ǀkhai, ǃhūb ai ǁhōxūhe hâ ǁgam-i khami ta ge ī; hoaraga ǂkhōn âtan ge uniǁaede xu ǀgora hâ, ǂgaob âtab ge tsunitsunihe hâ ǂnuruǁnui-i khami ī.

¹⁵ Ti dommi ge tsarab kōse a ǂnâsa tsîb ge nammi âtaba ǂkharub ai ra ǂae. ǁŌb di tsarab ǃnâts ge ra ǁnāxūǁgui te.

¹⁶ ǂKhaba khoen ge arin khami tita xāǂgā hâ; tsîn ge xam-i khami ti ǂaira tsî ǃomra tsîna ra ǀkhauǃā.

¹⁷ Hoaraga ǂkhōn tina ta ge a ǃgôa ǁkhā; ti khākhoen ge ǁnās ǂama tita ra mû ǁî ge ǃharaxūb ǀkha ra kō te.

¹⁸ Ti saranan ge ǁîn ǃnâ ge ǀgoragu tsîn ge ti anaǂamsarab ǂama ǂnōgusa ra ao.

¹⁹ ǃKhūtse, tā tita xu ǃnū hâ re! ǃHaese tita nî huise ǃnâǃkhoe te re!

²⁰ Gôaba xu ti ûiba sâu re; ti ûiba nē arina xu sâu re.

²¹ Xammi di amǃnâba xu tsî ǃgarogoman di ǁnâga xu ore te re.

²² Tita ge sa ǀonsa ti ǃgâsana nî khoraǂuiba, ǀhaohâb ǁaegu ta koatsana-e nî ǁnaeba tsi.

²³ Koa bi re, sadu ǃKhūb di ǃgādo! ǃGôa bi re, sadu Jakob di surido! ǀGoreǀî bi re, sadu Israeli dido!

²⁴ ǁÎb ge ǀgâsana ǃharaxū tamas ka io ǁîn di tsâba mû tama i tama hâ. Ais âbab ge gaugau tama hâ huib ǃaromab ga ǂgai ǃnubai tsî ra ǁnâu-am bi.

²⁵ Satsa xus ge ti koas, kai ǀhaos ǃnâ hâsa ra hā tsî ta ge tita ǁnān satsa ra ǃaoǃgân aiǃâ ti mîmâide nî dīǀoaǀoa.

²⁶ ǃGamǃgamsensan ge ǂû tsî nî ǁâ; ǁnān ǃKhūba ra ôan ge ǁîba nî koa, a gu sadu ǂgaoga ǀamose ûi re.

²⁷ Hoaraga ǀkhâuǀamdi ǃhūbaib didi ge ǂâihō tsî ǃKhūb ǃoa nî dabasen. Hoaraga ǃhaodi ge ǁîb aiǃâ ǃhon tsî ǁîba nî ǀgoreǀî.

²⁸ Gaosis ge a ǃKhūb di tsîb ge ǁîba hoaraga ǁaedi ǂama ra gaosîsen.

²⁹ Hoaraga ǃkhūǁîn ǃhūbaib din ge ǂû tsî ǁîba ra ǀgoreǀî, hoan hîa tsarab ǃoa ra ǁgôan ge ǁîb aiǃâ nî ǃhon; ǁnān hîa aitsama ûib ǃnâ ūhâsen ǁoana.

³⁰ Hā nî surib ge ǁîba nî ǃoaba; ǃgoaxaǁaeb di surib ge ǃKhūb xa nî ǁgambahe.

³¹ ǁÎb di ǂhanu-aisiban ge nî ǂhôa ganupe ǃnae taman ǃoa, ǁîb ǁnāsa dī hâ amaga.