Psalmdi 21 - Khoekhoegowab 2020

Dans di karetsanas

Davidi Psalms

¹ ǃKhūtse gao-aob ge ǀgaibats ge mā bi xui-ao a ǂkhî; ǁîb ge dansats ge mā bi xui-ao ra ǃgâiaǂgao.

² Sats ge ǁîb di ǂgaob ra ǁkhoren hoana ǁîba ge mā; ǁîb di ǂgansats ge ge ǁnâu-am.

³ Kai ǀkhaegu ǀkha ǁîb ǃoa hā tsîts ge ǁîba ǃhuniǀuri kronsa ge ǀgapa.

⁴ Ûibab ge ǂgan, ots ge gaxu ûiǁaeba ǁîba ge mā.

⁵ Sa huiba xub ge ǁîb di ǂkhaisiba a kai; ǁîbats ge ǂanǂansasib tsî ǃgôasib tsîkha ge mā.

⁶ Sa ǀkhaegu ge ǀamose ǁîb ǀkha hâ tsîb ge sa ǀgūhâsiba ǁîba ra dâ kai.

⁷ Gao-aob ge ǃKhūb ai ra ǂgomaiǂnûi tsîb ge Hoan xa ǀGapib di hâhâ ra ǀnammi ǃaroma ǁnobe tide.

⁸ Gao-aob ge hoaraga khākhoen âba nî ǃkhō; ǁîba ǁkhan hâ-i hoa-eb ge nî ǃkhō.

⁹ ǁÎb ge ǁîna khau ra ǀaes khami ǂhaib kao nî hîkākā. ǃKhūb ge ǁîna ǁaib âb ǃnâ nî ǀkhauǃā tsîs ge ǀaesa ǁîna nî hapu.

¹⁰ ǀGui-i ǁîn surib di-i tsîn ge ûiǃgau tide; gao-aob ge ǁîn hoana nî ǃgam.

¹¹ ǁÎn ge ǁîb ǃoagu nî ǀape xawen ge ǃgâiǃgâ tide.

¹² ǁÎb di ǂāgu ǀkhab ge ǁîna nî ǁkhâu tsîn ge dabasen tsî nî ǃkhoeni.

¹³ Koa tsi da ge ra ǃKhūtse sa kai ǀgaib ǃaroma! ǁNae tsî da ge sa ǀgaiba nî koa.