Psalmdi 19 - Khoekhoegowab 2020

Elob di ǂkhaisib, kurus ǃnâ

Davidi Psalms

¹ ǀHomgu ge Elob di ǂkhaisib tsî sîsengu ǁîb ǃomkha digu tsîna ra ǂanǂan.

² Tsēsa xu tsēs kōse gowaǂui tsîb tsuxuba xu tsuxub kōse ǁîb di ǂansa ra ǁgauǂui.

³ ǁNāpa i ge ǃhoa-i tamas ka io mî-i, tamas ka io ǀō-i xare-e ǁnâuhe tama hâ.

⁴ Xawes tsînas ge ǁîn di ǂhôasa hoaraga ǃhūbaibǀî ra ǂoa tsî ǃhūbaib di ǀkhâuǀamdi kōse ra ǁnâuhe. Tsîb ge Eloba soresa ǀhomgu ǃnâ tentomsa ge mâiba.

⁵ Tsîs ge ǁîsa ǁgoaga ǃgame-aob, ǁîb ǃnā-omsa xu ra ǂoaxab, ǃkhoe-aob ǃkhoes ǃoa ǂhomisen hâb khami ra ǂoaxa.

⁶ ǀGui ǀams ǀhommi disa xus nau ǀams kōse ra sī tsî i xū-i xare-e ǀgammi âsa xu a sâusen ǁoa.

ǃKhūb di ǂhanub

⁷ ǃKhūb di ǂhanub ge a dīǀoaǀoasa tsî ǀomsa ra khoakhoa. ǃKhūb di mîmādi ge a ǂgomǂgomsa tsî ǁau khoe-i tsîna ra gā-ai kai.

⁸ ǃKhūb di ǂnûiǂgādi ge a ǂhanu tsî ǂgaoba ra dâ kai. ǃKhūb di mîmādi ge a ǃgāsa tsî mûde ra ǃgā kai.

⁹ ǃKhūba ǃaoǃgâs ge a ǃanu tsî ǀamosib kōse ra hâ. ǃKhūb di ǀgoraǃgâdi ge a ǂhanu-ai tsî hoaǁae hoatsama a ǂhanu.

¹⁰ ǁÎdi ge ǃūmû ǃhuniǀurib ǃgâ-ai a ǃgomǀgausa; ǁîdi ge ǃūmû dani-i ǃgâ-ai a ǂkhon.

¹¹ ǁKhāti di ge sa ǃgāta ona ra ǁkhāǁkhā tsî ta ge ǁîde ǁnâuǀnams di mādawa-amsa ra hō.

¹² Tari-e tsūdīn â-e aitsama nî ǂan? ǃKhūtse ore te re nē sâusa tsūdīna xu.

¹³ ǂAnapega ǁoren tsîna xu sâu te re, în ǁîna tā tita gaoǂam. O ta ge dīǀoaǀoasa tsî ǁoreb di ǂkhababa xu nî ǃnorasa.

¹⁴ A di ūǃoasa re ti mîdi tsî ǂâide sats tawa Ti ǃKhū, ti ǁhaiǁhâǃkhai tsî ore-aotse!