Psalmdi 145 - Khoekhoegowab 2020

Karetsanas

Davidi karetsanas

¹ Satsa ta ge nî kaikai ti Elo tsî Gao-aotse! Sa ǀonsa ta ge ǀamos kōse nî koa.

² Mâ tsēs hoasa ta ge satsa nî koa tsî sa ǀonsa nî kare ǀamosiba xu ǀamosib kōse.

³ ǃKhūb ge a kai, tsî koahesa anu ǁîb kaisib ge ôaǃnâheǁoasase ī.

⁴ Nē ǃhaosa xu nau ǃhaos kōsen ge sa sîsenga ra koa sa ǀgaisa dīgan ge ra ǂhôa.

⁵ Kaisib sa ǂkhaisib di anusib dib tsî sa buruxa sîsengu xa ta ge nî ǂâiǂâisen.

⁶ Sa mîǂuiheǁoasa dīgu di ǀgaib xan ge khoena nî ǃhoa; sa kaisiba ta ge tita nî ǂhôa.

⁷ Sa kaisib xa hâ ǂâiǂâisendi xan ge nî ǃhoa sa ǂhanu-aisib xan ge dâb ǀkha nîra ǃhoa.

⁸ ǃKhūb ge ǀkhomxaǂgao tsî a ǀkhomxa ǃnūǃnâxa tsîb ge kai hâhâ ra ǀnammi xa ǀoa hâ.

⁹ ǃKhūb ge hoana a ǃgâiba; ǀkhomxaǂgaosigu âb ge ǁîb sîsengu hoagu ǂama hâ.

¹⁰ ǃKhūtse sa sîsengu hoagu ge ra koa tsi sa ǂgomǂgomsa saoǃgonaon ge ra kare tsi.

¹¹ Sa gaosib di ǀgaib xan ge ǁîna ra ǃhoa tsîn ge sa ǁkhāsib xa ra ǃhoa.

¹² Khoesib nî sa ǀgaisa sîsenga ǂan ǁkhāse sa ǂkhaisa gaosib di ǀgaib xa.

¹³ Sa gaosis ge hoa ǀamosib kōse hâ sa gaosis ge ǃhaosa xu ǃhaos kōse ra hâ.

¹⁴ ǃKhūb ge ǁnā ran hoana ǂkhâǃnâ tsî ǁnān ǃgamǃgâ hâna ra ūkhâi.

¹⁵ Hoa mûdi ge ǃâubasens ǀkha sa ai ra kō; tsîts ge ǁîna ǁaeb ai ra ǂûmā.

¹⁶ Sa ǃommats ga ǁkhowa-am, ots ge ûitsaman hoana ǂhâban hân ǀkha ra ǁâǁâ.

¹⁷ ǃKhūb ge a ǂhanu-ai, ǁîb daogu hoagu ǃnâ, tsîb ge a ǂgomǂgomsa sîsengu hoagu âb ǃnâ.

¹⁸ ǃKhūb ge ǁîba ra ǂgaiǀîn hoana ǀgūse hâba; hoan ǁîba amab ǃnâ ra ǂgaiǀîna.

¹⁹ ǁNān ǁîba ra ǃaoǃgân ǁkhoregab ge ra dīǀoaǀoa; ǁîn ǀkhomabasensa ǁnâu tsîb ge ǁîna ra ore.

²⁰ ǃKhūb ge ǁîba ǀnam hân hoana ra sâu, xaweb ge ǂkhaba khoen hoana ra hîkākā.

²¹ Ti ams ge ǃKhūb di karesa nî ǂhôa; Khoesib hoab ge ǁîb ǀonsa nî koa, hoa ǀamosib kōse.