Psalmdi 144 - Khoekhoegowab 2020

Gao-aob ge Eloba dans ǃaroma ra gangan

Davidi Psalms

¹ ǃKhūb, ti ǃgareǀuiba ab koahe re, ti ǃomkha ǃkhamsa ǁkhāǁkhā tsî ti ǀkhunuga torodīsa ra ǁkhāǁkhāba.

² Ti hâhâ ra ǀnammi tsî ti ǁaposa hâǃkhaib, ti ǁhaiǁhâǃkhai tsî ti ore-aose ība ti ǁkhaukhōs, ǁîb tawa ta ra sâusenna. ǁÎb ge ǁaede ti ǃnaka ra ǃgamǃgam.

³ ǃKhūtse tare xū-e khoe-e ots ra ǁî-i xa ǂâi? Tsî khoen ôa-e, ots ǁî-i ai ǂâisa ǂnûi?

⁴ Khoe-i ge ǀommi khami ī ûib â-i ge sommi, ǃgû-ī rab khami ī.

⁵ ǃKhūtse sa ǀhomma ǃgam î ǁgôaxa re ǃhomga tsâǀkhā, î gu ǀan re.

⁶ A gu napaga hâ tsî ǁîna ǀgaruǀgaru; sa ǂāga sî re, î ǁîna hîkākā.

⁷ Sa ǃomkha ǀgapiseba xu ǀhōǂui; ore, î huiǂui te kai ǁgamga xu, ǃhaokhoen di ǃomǁaeba xu.

⁸ ǁNān amdi ân ra ǂhumiba ǃhoa tsî amǀkhāb ǃomgu ân a gāxaǃnâna xu.

⁹ ǀAsa ǁnaetsana-e ta ge ra ǁnaeba tsi ǂgao Elotse disiǁapaxa ǀkhōxūs ǀkha ta ge ra koaǁnaeba tsi ǂgao.

¹⁰ Sats gao-aoga dansa ra mātsa Davidi, sa ǃgāba ǁōǁōsa gôaba xu ge sâutsa.

¹¹ Ore î huiǂui te re khākhoen di ǀgaiba xu; amdi ân ra ǂhumiba ǃhoa tsî amǀkhāb ǃomgu âna a gāxaǃnâna xu.

¹² Sida ôaga gu kaiǀoa hâ ǂgāxūse ī ǂkhamkhoesis âgu ǃnâ, tsî sida ôade ǁhôaǀuigu, gao-ommi kuruǀgaub ǃoa ǂnau-unuhe hâdi ase.

¹³ Î gu sida ǃhorosâu-omga hoa ǂûǃnôan xa ǀoa, tsî sida ǀgoana ǀoadisidi tsî kaiǀoadisidi ǀkha ǀarosen sida ǃû-aidi ǃnâ.

¹⁴ Tsî sida gomade ǀoasase ǃkhûi tsî ǂkham-i xare-e hâ tide, ǃkhōsis ǃnâ ūhes, tamas ka io ǃaoǃaosa ā-i sida ǃādi ǃnâ hâ tidese.

¹⁵ ǀKhaehes ge hâ ǁnā ǁaes ǁîs ǀkha ǁnāti ra ǃgûsa ǀkhaehes ge hâ ǁnā ǁaes, ǁîs di Elob a ǃKhūsa!