Psalmdi 139 - Khoekhoegowab 2020

Elob ge hoa xūna ǂan

Davidi Psalms

¹ ǃKhūtse sats ge ge ôaǃnâǃganu te tsî a ǂan te.

² Sats ge ti ǂnûs tsî khâisa a ǂan; ti ǂâidets ge ǃnūseba xu ra ǁnâuǃā.

³ Ti ǃgûs tsî ti ǁgoesats ge satsa ra ôaǃnâ tsîts ge ti daogu hoaga ǃgâise a ǂan.

⁴ Mî-i ganupe ti nams ai ǀkhai hîats ge satsa ǀnai a ǂan ǃKhūtse.

⁵ Sats ge ǃgâbǀkhāba xu tsî aisǀkhāba xu ra ǃnamiǂgā te tsîts ge sa ǃomma tita ai ra ǁgui.

⁶ Nē ǂans ge kaise buruxaba te ǀgapiba te a tsî ta sīǃnâ ǁoa.

⁷ Mâǀî ta kha sa gagaba xu nî ǃgû? Mâǀî ta kha nî ǁhâ, sa aisa xu?

⁸ ǀHommi ǃoa ta ga ǃapa, ots ǁnāpa hâ ǁŌhân Hâǃkhaibǀî ta ga ǁgôa, ots ǁnāpas tsîna hâ!

⁹ ǁGoaǂnobos di ǁgabokha ta ga ū tsî huribǀams ai sī ǁan;

¹⁰ ob sa ǃomma ǁnāpas tsîna nî ǂgaeǂgui te; sa amǀkhāb ǃomma nî ǃkhōǀgara te.

¹¹ Tsî ta ga tita mî: ǃKhaenab ga ǃgū-ai te tsîb ga ǃnâba ti ǂnamipe tsuxu kai

¹² xaweb ge ǃkhaenab tsîna satsa kaise ǃkhaeba tama hâ tsîb ga tsuxuba tsēab khami ǃnâ xaweb ge ǃkhaenaba ǃnâb khami ra ī.

¹³ Sats ge ti ǃnaira ge kurutsa; sats ge ti îs di ǁhās ǃnâ tita ge ǂnubi.

¹⁴ Koa tsî ta ge ra, ama buruxase ta kuruhe hâ amaga. Buruxa gu ge a sa sîsenga; ǁî ǃkhaisa ta ge ǃgâise a ǂan.

¹⁵ Ti ǂkhōn ge satsa ge ǂganǃgâsaba tama hâ i ǂganǃgâsib ǃnâ ta ge kuruheo; ǃhūbaib di ǃgamsib ǃnâ ta ge ǂnubiheo.

¹⁶ Ganupe ta kuruhe tama hîa ra ge sa mûra ge mû te, tsîn ge hoana sa ǂkhanis ǃnâ a xoamâisa; tsēdi hîa nî hāde, ǀguis xawes âdi a ǀkhai hîa.

¹⁷ Tsî tita ǃaromasa mâtikōse di a ǃgom sa ǂâide ti Elotse Mâtikōseb a kai ǁîdi ǃgôaba!

¹⁸ ǃGôatsâ ta ka, xawe di ge ǁîde ǃhūb ǃgâ-ai nî ǃnāsa. ǂKhai ta ka, o ta ge noxopa sats ǀkha hâ.

¹⁹ Sats ga eloxoresana ǃgamo, Elotse sago ǀaob digo, ǂgōxū te re

²⁰ ǁÎn ge gāxaǃnâ xūna sats xa ra ǃhoana sa khākhoen, sa ǀonsa ǁause ra sîsenūna.

²¹ O ta kha ǁkhān tide ǃKhūtse, ǁnān satsa ra ǁkhanna? ǁNān sa ǃoagu ra khâimâna ta kha mâǃoa tide?

²² Tita ge ǁîna ǀoasa ǁkhanni ǀkha ra ǁkhan, khākhoen ase ta ge ǁîn xa ībahe.

²³ Ôaǃnâǃganu te re ǃKhūtse, î ti ǂgaoba ǂan re! ǃÂitsâ te re î ti sâoǃnâ ǂâide ǂan re,

²⁴ î mû re ise i tsū dao-e tita tawa hâsa, î ǀamo daob ai ǂgaeǂgui te re.