Psalmdi 106 - Khoekhoegowab 2020

ǃKhūb di ǃgâisib ǁaes âb ǃoa

¹ Haleluja! Koa re ǃKhūba ǁîb di ǃgâisib ǃaroma ǁÎb di hâhâ ra ǀnammi ge ǀamose hâ.

² Tari-e kha ǀgaisa dīgu ǃKhūb diga a mîǂui ǁkhā, tsî ǁîb koasa a ǂanǂan ǁkhā?

³ ǀKhaehen ge hâ ǁnān ǂhanuba ra ǁnâuǀnamna ǁnān hoaǁae ǂhanu-aisiba ra dīna.

⁴ ǂÂi re tita xa ǃKhūtse, sa ǁaesats ga ǀkhomxa ǁaeb ai sa ǃgâiǃōsib ǀkha sari te re.

⁵ Î ta sa ǁhûiǂuisaben ǀkha, ǃgâi xūn ǁînats ūba hân ǃnâ ǁhao sa ǁaes di ǃgâiaǂgaob ǃnâ ǃâ tsî ta ǁîn ǀkha sa ǀumisa nî koasense.

⁶ Sida aboxan ǀkha da ge ǀguipa ge ǁore, sida ge ǂkhabase ge dī.

⁷ Sida aboxan ge Egipteb ǃnâ ǂâisa sa ǀgaisa sîsengu ai ge ǂnûi tama hâ i. Tsîn ge sa hâhâ ra ǀnamma ǂâihō tama i tsî hurib tawa, ǂĀxahurib tawa ge khâikhâisen.

⁸ Xaweb ge ǁîna ǀons âb di ǃgôasib ǃaroma ge sâu; ǁîb ǁkhāsibab nî ǂan kaise.

⁹ ǂĀxahuribab ge ǀau ob ge ge ǂnâ; ǁîb ge ǁîna ǃgaroǃhūb ǃnâs khami, ǁgamgu ǁaegu ge ǃgû kai.

¹⁰ ǁÎb ge ǁîna khākhoen di ǃomma xu ore tsî mâǃoasaben ân di ǃomma xu ge ǃnoraǃnora.

¹¹ ǁGammi ge ǁîn mâǃoasabena ge ǃgū-ai, tsî-i ge ǀgui-i ân tsîna ûiǂoa tama ge i.

¹² On ge mîmâidi âba ǂgom tsî ǁîba ge koaǁnaeba.

¹³ Xawen ge ǃhaese ǁîb dīga ǀuru tsî ores di ǀapes ǁîb disa ǃâu tama ge i.

¹⁴ ǁÎn turagu xan ge ǃgaroǃhūb ǃnâ gaoǂamhe tsî Eloba ǃgaroǃhūb ǃnâ gere ǁgoaǂui.

¹⁵ ǁÎb ge ǁîna ǂgann ge xūna ge mā, xaweb ge ǁîn ǃnâ ǂhīǁōba ge sîǂgā.

¹⁶ Moseb ǃoagun ge surib ǀkha ge khâi tsî Aronni, ǃKhūb xa ge khaihe hâ ib ǃoagu.

¹⁷ ǃHūb ge ǁkhowa-amsen tsî Datanna ge haraǂgā, Abirammi ǀkha hâgu ǂamab ge ge ǂganamsen.

¹⁸ ǁÎgu ǁaegus ge ǀaesa ge khau ǀaeǁhabugu ge eloxoresa khoena ge khauǃkhū.

¹⁹ Horeb tawan ge ǁîna tsâuba ge kuru, ǁîn ge ǁgôa-elob aiǃâ ǀgoreǀî nîse ge ǃhon.

²⁰ ǁÎn ge ǁîb ǂKhaisiba ge ǃkhōǃkhuni gomab, ǀgâna ra ǃûb di īb ǀkha.

²¹ ǁÎn ge Elob ǁîna ge ǃnora kaiba ge ǀuru, ǁnāb hîa kai xūna Egipteb ǃnâ ge dība.

²² Buruxa xūna Xammi di ǃhūb ǃnâ ge dīb ǃaoǃaosa sîsenga, ǂĀxahurib tawa.

²³ ǁÎb ǃnâb ge ǁîna hîkākāsa gere ǂâi Moseb, ǁîb di ǁhûiǂuisabeb ga ǁîna ǃhoaba tama i, tsî ǁnāti ǁîb di hîkākā ra ǁaixasiba ǂkhā bi tama i hâo.

²⁴ ǁÎn ge ǃgomǀgausa ǃhūba ge ǂhara tsîn ge mîs âba ǂgom tama ge i.

²⁵ ǁÎn tentomdi ǃnân ge gere ǁaixa, tsîn ge ǃKhūb domma ǁnâuǀnam tama ge i.

²⁶ ǁÎb ge ǃommi âba ǁîn ǃoagu ge ūkhâi ǁînab ǃgaroǃhūb ǃnâ nî ǂnauǁguise;

²⁷ ǁîn di suriba ǁaedi ǃnâ ǂnauǁgui tsîb ǁîna ǃhūgu ǃnâ nî ǀgaruǀgaruse.

²⁸ ǁÎn ge ǁkhāti Baal-Peori ǀkha ge ǃgaeǁaresen tsî ǁō hân ra ǁguibahena gere ǂû.

²⁹ ǁÎn tanisens ǀkhan ge ǁîba gere ǁgoaǂui tsîs ge tsûtsû-aisa ǁîn ai ge hāǂam.

³⁰ Pinehab ge ǁaegumâ-aose ge khâi tsîs ge tsûtsû-aisa ge ǁkhaehe.

³¹ Nēs ge ǁîba ǂhanu-ai dīǃkhais ase ge ǃgôabahe ǃhaosa xu ǃhaos kōse, ǀamose.

³² Meribas ǁgamgu tawan ge ǁîba ge ǁaiǁai tsî i ge ǁîn xa ǃaromahe hâse ǃgâi tamase Moseb ǀkha ge hā.

³³ ǁÎn ge Elob Gagab ǃoagu khâi on ge tsū mîna Moseb amǁgaukha ai ge hā.

³⁴ ǁÎn ge Elob ge ǁîna ǁgau ǁaede ǁîb ge mîmā khami sauruǂui tama ge i.

³⁵ ǁÎn ge ǃhaodi ǀkha habagu tsî ǁîn ǁnaetiga ge ǁkhāǁkhāsen.

³⁶ ǁÎn ge ǁîn di ǁgôa-eloga gere ǃoaba tsîs ge ǁnāsa ǁîna ge ǁnoa kaiba.

³⁷ ǁÎn di ǀgôagu tsî ǀgôadi tsînan ge ǁgâuaga ge ǁguiba.

³⁸ Tsîn ge ǁnā ǀgaus ai ǀhapio ǀaoba ge ǂnâxū, ǁîn ǀgôagu tsî ǀgôadi di ǀaob, Kanaanni di ǁgôa-elogan ge ǁguibaba. Tsîb ge ǃhūba ǀaoǀhapis xa ge ǀuriǀurihe.

³⁹ ǁÎn ge ǁnā ǁnaetigu xa ge ǃanuoǃnâ, dīgu ân ǀkhan ge ge ǃgamekhôa.

⁴⁰ ǃKhūb di ǁaib ge ǁaes âb ǃoagu ge ǂhubi; ǀumis âba ǃharaxū

⁴¹ tsîb ge ǁîna ǁaedi ǃomǁae ge māǁnâ; khākhoen âna ǁîn ǂama gaosîsen

⁴² tsîn mâǃoasaben âna ǁîna gere ǁgâiǀāse; ǁîn aiǃân nî ǃhonse.

⁴³ ǂGui ǃnādeb ge ǃKhūba ǁîna ge huiǂui xawen ge ǂans ǃnâ mâǃoaxa tsî ǃûǂams ân ǃnâ ge tsō.

⁴⁴ Xaweb ge ǁîn ǂhâsiba ge mû, ǁîn ǃgaesab ge ǁnâuo.

⁴⁵ ǁÎn ǃaromab ge ǃgaeǀhaos âb xa ge ǂâi tsîb ge ǁîna ge ǀkhom, ǁîb di ǃnāǂamsa hâhâ ra ǀnamma xu.

⁴⁶ ǁÎb ge ǁnān hîa ǁîna ǃkhōsis ǃnâ ge ūn xan nî ǀkhomhese ge dī.

⁴⁷ Ore da re ǃKhūtse, sida Elotse î ǁaede xu ǀhaoǀhao da re. Sa ǃanu ǀonsa da nî koa tsî satsa koas xa ǃgâiaǂgaose.

⁴⁸ ǃKhūb Israeli Elob diba ab koahe re ǀamosiba xu ǀamosib kōse. Hoaraga ǁaesa as mî re: “Amen! Koa re ǃKhūba!”