Psalmdi 105 - Khoekhoegowab 2020

Elob tsî ǁîb ǁaes

¹ Koa re ǃKhūba, kaisib âba ǂanǂan re; tarenab ge dīsa ǃhaode mîba re.

² ǃKhūba koaǁnaeba re ǁîb di buruxa dīn hoan xa ǃhoa re.

³ ǁÎb ǃanu ǀons ǃnâ koasen re a gu ǁnān ǃKhūba ra ôan di ǂgaoga ǃgâiaǂgao re.

⁴ ǃKhūb tsî ǁîb di ǀgaiba ôa re hūkaǀgui ǁîb ǀgūhâsiba ôa re.

⁵ Buruxa dīn ǁîb ge dīn xa ǂâi re, ǁîb saodi tsî ams âb di ǀgoraǃgâde;

⁶ sadu Abrahammi, ǁîb ǃgāb di suridu Jakob ôadu, ǁîb ǁhûiǂuibasen hâdo.

⁷ ǁÎb ge ǃKhū, sada Elo, ǀgoraǃgâdi âb hoaraga ǃhūbaib ai a sîsenxaba.

⁸ ǁÎb ge ǀamos kōse ǁîb ǃgaeǀhaosa ra ǂâihō, ǀoadisidi di surigab ge mîmâibasa;

⁹ Abrahammi ǀkha tsî Isaki ǀkhab ge dī nūsab ge nî dīǀoaǀoa.

¹⁰ Tsîb ge Jakob ǀkha mîmās ase ge ǁapoǁapo Israelǁaes ǃoa, ǀamo ǃgaeǀhaos ase.

¹¹ “Satsa ta ge Kanaanǃhūba ra mā sadu ǀumis di ǃâs ase” ti hâ mîdi ǀkha.

¹² ǀOro ǃgôab di khoen asen ge ge ī i; ǃhaokhoese Kanaanǃhūb ǃnâ.

¹³ Tsîn ge ǁîna nē ǃhaosa xu naus ǁga gere doema, nē gaosiba xu nau ǃhaos dib ǁga.

¹⁴ ǀGui khoe-i tsînab ge ǁîna nî ǁgâiǀāse mā-am tama ge hâ i; tsîb ge gao-aoga ǁîn ǃaroma gere ǀau.

¹⁵ “Tā ti ǀnausabena tsâǀkhā î ti kēbo-aona tā ǂkhôa.”

¹⁶ ǁÎb ge ǃâtsūǀkhāba ǃhūb ǂama ge ǂgai pereb hoabab ge ge khôaǂkhū.

¹⁷ ǁÎn aiǃâb ge khoeba ge sîǂui Josefi khobose ge ǁamaxūheba.

¹⁸ Khoen ge ǂaira âba khedegu ǀkha ge ǃgae tsîb ge ǀuriba ge ǃgaeǃaohe,

¹⁹ mîdi âb ge ǀoas kōse. ǃKhūb mîs ge ǁîba ge ǃâitsâ.

²⁰ Gao-aob ge ge mîmā tsîb ge ge ǁnāxūhe; ǃhaodi di gao-aob ge ge ǃnoraǃnora bi.

²¹ Tsîb ge hoanab nî mûǂamse ge mâi bi, ǁîb ūhâxūn hoanab nî mûǂamse.

²² ǁÎb mâisana ǁîb ra ǂâi khami ǁguiǂamde mā tsî kaina gā-aisiba nî ǁkhāǁkhāse.

²³ Israeli ge Egipteb ǃnâ ge hā; Jakob ge Xammi ǃhūb ǃnâ ǃhaokhoese sī ge ǁan.

²⁴ ǃKhūb ge ǁîb ǁaesa ge ǂûǂûxa kai. ǁÎb ge ǁîna mâǃoasaben ân xa ǃnāsase dī.

²⁵ ǁÎb ge ǂgaogu âna ge karokaro, ǁîb ǁaesa ǁkhan tsîn ǀhôagaose ǁîb ǃgān ǃoagu nî sîsense.

²⁶ ǁÎb ge Moseb ǁîb ǃgāb tsî Aronni hîab ge ǁhûiǂuib tsîkha ge sî.

²⁷ ǁÎkha ge Egipteǁîn ǁaegu ǁîb saode gere dī tsî buruxa dīna Xammi ǃhūb ǃnâ gere dī.

²⁸ ǁÎb ge ǃkhaenasa sî tsî ǃhūba ge ǃkhae kai xawen ge ǁîb mîde ge mâǃoa.

²⁹ ǁÎn di ǁgam-eb ge ǀaob ǃnâ ge ǀkharaǀkhara tsî ǁaun âna ge ǁō kai.

³⁰ ǃHūb ân ge ǁgūtsiǁgūben xa ge ǀoa gao-aogu di ǁomǃnâǃnā-omdi kōse.

³¹ ǁÎb ge ge ǃhoa tsîn ge ǀanina ge hā ǀûitsina, hoaraga ǁanǀkharib ân ǃnâ.

³² ǀNanub ânab ge ǃnareb ǃnâ ge ǀkharaǀkhara napab ǀkha, ǁîn di ǃhūb ǃnâ.

³³ ǁÎn di draibehain tsî ǀnomahaideb ge ge hîkākā; ǁîn ǁanǀkharib di hainab ge ge khôaǂkhū.

³⁴ ǁÎb ge ge ǃhoa tsîn ge ǂhomna ge hā ǃgôaheǁoasase kai ǃgôab ǃnâ.

³⁵ Tsîn ge ǁîna hoaraga ǃhanagu ǁîn ǃhūb diga ge hapu ǁîn ǃhūb di ǂûtaniba.

³⁶ Tsîb ge mâ ǂguroǃnaesab hoaba ǁîn ǃhūb ǃnâ ge ǂnau ǂguroǃnaesagu ǁîn ǀgaigu hoagu diga.

³⁷ ǁAes âbab ge ǃhuniǀurib tsî ǀhaiǀurib xa ǃkhū hâse ge doe kai; ǃhaodi âb ǁaegu i ge ǃnôa ra khoe-e ge ǀkhai i.

³⁸ Egipteb ge ǁîn ge doeǂoa o ge ǃgâiaǂgao, Israelǁîna ǃaos ge ǁîna gaoǂam hâ i xui-ao.

³⁹ ǃÂusab ge ǁîna nî sâuse ge khoraǂui tsî ǀaesa tsuxuba nî ǃnâǃnâse.

⁴⁰ ǁÎn ge ǂû-e ǂgan, ob ge ǁîna ǃhaudi ge sîba, tsîb ge ǀhomma xu hâ pere-i ǀkha ǁîna ge ǁâǁâ.

⁴¹ ǁÎb ge ǃgareǀuiba ge ǁkhowa-am, tsîb ge ǁgamma ge dâuǂoaxa ǃāba, ǂnâsa ǀkharigu ǃnâ.

⁴² ǁÎb ge ǁîb di ǃanu mîs tsî Abrahammi, ǁîb ǃgāb xa ǂâi ǃnubai.

⁴³ Tsîb ge ǁaes âba ǃgâiaǂgaob ǀkha ge ǂgaeǂguiǂui dâ rase, ǁîb ǁhûiǂuisabesa.

⁴⁴ Tsîb ge ǁîna ǃhaodi di ǃhūǀkhariga ge mā. ǁAedi ge ǀhupub ǀkha hōbasen xūnan ge ǀumixūse ge ūbasen.

⁴⁵ ǁÎb di ǁaposa xoaǁguiga dīǀoaǀoa tsîn ǁîb ǂhanugu ǃoa nî ûise. Koa re ǃKhūba!