Psalmdi 102 - Khoekhoegowab 2020

ǀAmo gao-aob ǃoa hâ ǀgores, huib ǃaroma

ǀKhomǀkhomsab di ǀgores ǂkhabub kao, ǃgaes âbab ǃKhūb tawa ra ǁhōǂui ǃnūbai

¹ Ti ǀgoresa ǁnâu re ǃKhūtse as ti ǂgaisa sats tawa sī re.

² Tā ais âtsa ǂōǂōsib tsēs ai tita xu gaugau re. Sa ǂgaesa tiǀî ǂō re, saǀî ta ga ǂgai tsēs ai î ǃhaese ǁnâu-am te re.

³ Ti tsēdi ge ǀanni khami ra kā tsî ti ǂkhōna ǀaes khami ra ǂhubi.

⁴ Ti ǂgaob ge ǂnauhe tsî ǂnâ hâ ǀgâb khami, tsî ta ge ti pere-e ǂûsa ra ǀuru.

⁵ Ti ǀhâimâinǀoms xab ge ti khōba ǂkhōgu ai ra ǂae.

⁶ Kai-anis ǃgaroǃhūb dis khami ta ge ī, ǀhonos, khôaǂkhūsa ǃkhaidi ǃnâ hâs khami.

⁷ ǂKhaikari ta ge ǁgoe tsî ta ge ǀguri oms ǂamǃnâ hâ ani-i khami ge ī.

⁸ Hoaraga tsēsan ge ti khākhoena gere mîǁgaiǁgai te, ǁnān ǃhō te geren ge ti ǀons tawa gere ǀâxare.

⁹ Pere-i khami ta ge tsaoba ra ǂû tsî ti āxū-e ǁgamrob ǀkha ra haba.

¹⁰ Sa ǀâxareb tsî ǁaixasib ǃaromats ge ūkhâi tsî ge aoxū te.

¹¹ Ti tsēdi ge gaxugaxuhe hâ sommi khami ī ǀgâb khami ta ge ra ǂnâ.

¹² Tsî sats ǃKhūts ge ǀamose ra gaosîsen, tsîts ge ǃhaosa xu ǃhaos kōse ra ǂâihōhe.

¹³ Sats ge khâimâ tsî Sionsa nî ǀkhomxa ǁaeb ǀkhomhes dib go ǀoa xui-ao, mîmâisa ǁaeb go hā amaga.

¹⁴ Sa ǃgān ge ǁîs di ǀuidi xa a ǃgomǀgausabahe tsîn ge tsarab âsa ra ǀkhom.

¹⁵ ǃHaodi ge ǃKhūb ǀonsa nî ǃao; hoa gao-aogu ǃhūbaib diga ǁîb ǂkhaisiba.

¹⁶ ǃKhūb ge Sionsa nî ǂnubi tsîb ge ǁîb ǂkhaisib ǃnâ nî ǂhai.

¹⁷ ǁÎb ge ǁnān xū-e ūhâ tama hân di ǀgorede ra ǁnâu-am tsî ǁîna ǂhara tama hâ.

¹⁸ As nēsa hā nî suriba xoamâibahe în ǁnān noxopa ǃnae tamana ǃKhūba koa.

¹⁹ ǁÎb ǃanusib di ǀgapisiba xub ge ge kōǁnâ, ǀhomma xub ge ǃKhūba ǃhūbaib ǁga ra kōǁnâ.

²⁰ ǃKhōsaben di ǃgaesa ǁnâu tsîb ǁōb di ôana nî ǃnoraǃnorase.

²¹ ǁÎn ge ǃKhūb di ǀonsa Sions ǃnâ nî ǂhôa tsî koas âba Jerusalems ǃnâ.

²² ǁAede ǀhao tsî gu gaosiga ǃKhūba nî ǃoaba ǁaeb ai.

²³ ǁÎb ge ti ǀgaiba ge ǂkhabu kai; ti tsēdeb ge ge ǃnubuǃnubu.

²⁴ O ta ge ra mî: “Elotse tā ti ǂkhamsis di tsēdi ǃnâ ū te re.” Sats ge nē suriba xu nau surib kōse ûi hâ.

²⁵ ǃKharu ge ǁaeb aiǃâts ge satsa ǃhūbaiba ge ǃgaoǃgao; ǀhommi ge a sa ǃomkha di sîsen.

²⁶ ǁÎkha ge nî kā, xawe sats ge ǀamose nî hâ. Saran khamin ge hoana nî ǀorotoa anaǂamsarab khamits ge ǁîna nî anaǃkhuni, tsîn ge nî kā.

²⁷ Xawets ge satsa a ǁkhā sa kurigu ge tātse ǀam tama hâ.

²⁸ Sa ǃgān di ôan ge nî ǁan ǁîn di ôananôagub ge sa ǀgūhâsib ǃnâ nî ǃgaoǃgaohe.