Numeri 23 - Khoekhoegowab 2020

¹ Bileammi ge Balaki ǃoa ge mî: “Hû altarde nēpa kuruba te, î hû ǁgōgu tsî hû baigu tsîna hā-ūba te.”

² Balaki ge mîbaheb ge khami ge dī; ǁîb tsî Bileammi tsîkha ge mâ altars hoas ai ǁgōb tsî baib tsîkha ge ǁguiba.

³ ǁNās khaoǃgâb ge Bileamma Balaki ǃoa ge mî: “Aibe nēpa sa ǁguibas tawa mâǀgara, î ta tita ǃgû tsî kō iseb ǃKhūba nî ǂhai te ǃkhaisa. ǁÎb ga mîba te xū-i hoa-e ta ge hā nî mîba tsi.” ǁNātib ge ǁîba ǀguri ǃhommi di ǂaob ai ge ǂoa.

⁴ Elob ge Bileamma ge ǂhai tsîb ge Bileamma ǁîb ǃoa ge mî: “Hû altarde ta ge kuru tsî mâs hoas ai ǁgōb tsî baib tsîkha nî ǁguiba.”

⁵ ǃKhūb ge Bileamma tare-eb nî mîsa mîba tsî Balaki ǁga ǁîba ge sî-oa, ǃKhūb di ǂhôasa sī nî mîbase.

⁶ Bileammi ge oa tsî Balaka noxopab ǁîb di ǁguibas tawa, Moab di ǂgaeǂgui-aogu hoagu ǀkha mâse sī ge hō.

⁷ Tsîb ge Bileamma sao ra kēbosa ge gowaǂui: “Moab di gao-aob Balaki ge go hā-ū te; Siriaba xu, aiǂoas ǃhomga xu. ‘Hā, î ǃhoaba te’ tib ge go mî. ‘Israelǁîna ǀâxareba te.’

⁸ Mâti ta kha Elob ǀâxare tama khoena nî ǀâxare, tamas ka io ǁîn di hîkākāhesa nî gowaǂui, ǃKhūb ǁîsa dī tama hîa?

⁹ ǀGapi ǀuiga xu ta ge ǁîna mû ǁkhā; ǃNâuga xu ta ge ǁîna a ǃkhē ǁkhā. ǁNās ge ǁaes ǀguri a ûi ǁkhāsa; ǁÎn ge nau ǁaedi ǃgâ-ain ǃnāsase ǀkhaesa ǃkhaisa a ǂan.

¹⁰ Jakob surib ge tsarab khami ī, kaisen ge ǁîna ǃgôas ǃaroma a ǂgui. A ta ti tsēde Israelǁîn di ǀgui-i ase ǀamǀam; a ta ǂkhîb ǃnâ ǂhanu-ai-i khami ǁō.”

¹¹ Ob ge Balaka Bileammi ǃoa ge mî: “Tare-ets go dī? Tita ge nēpa ti khākhoenats nî ǀâxarese go hā-ū tsi, xawets ge ǁnās ǃās ǃnâ ǁîna go ǀkhae.”

¹² Ob ge Bileamma ge mî: “Tita ge ǃKhūb ra mîba te xūn ǀguina ra mî.”

Bileammi ǀgamǁî kēbos

¹³ ǁNās khaoǃgâb ge Balaka Bileammi ǃoa ge mî: “ǀNî ǃkhais Israelǁîn di ǀgui ǃâb ǀguibats nî mûs ǁga tita sao, îts ǁîna ǀâxareba te.”

¹⁴ Balaki ge ǁîba Sofimǃgaroǃhūb ǁga ǃgû-ū tsî Pisgaǃhommi ǂaob ai ge ūǃapa. ǁNāpas tsînab ge hû altarde kuru tsî mâs hoas ai ǁgōb tsî baib tsîkha ge ǁguiba.

¹⁵ Ob ge Bileamma Balaki ǃoa ge mî: “Nēpa sa ǁguibas tawa mâǀgara, î ta Eloba naupa sī ǀhao-ū.”

¹⁶ ǃKhūb ge Bileamma ǂhai tsî tare-eb nî mîsa mîba tsî Balaki ǁga ge sî-oa, ǃKhūb di ǂhôasa ǁîba sī nî mîbase.

¹⁷ Bileammi ge oa tsî Balaka noxopab ǁîb khauǁguibas tawa, Moab di ǂgaeǂgui-aogu hoagu ǀkha mâse sī ge hō. Balaki ge ǁîba tare-eb ge ǃKhūba mî ǃkhaisa ge dî.

¹⁸ Ob ge Bileamma sao ra kēbosa ge gowaǂui: “Sipori ôa, Balaktse hā re, î tare-e ta ra mîsa ǃgâ.

¹⁹ Elob ge khoe tama, ǂhumib nîse; ǁîb ge khoe tama, ǁîb ǂâisab nî dawase. ǁÎb ga xū-e mîmâi, ob ge ǁnāsa hoaǁae ra dīǀoaǀoa; ǁîb ga ǃhoa, o ra dīhe.

²⁰ Tita ge ǀkhaeba ta nî gowaǂuise ge ǁgui-aihe, tsî Elob ga ǀkhae, o ta ge tita ǁnāsa a ǂgae-oa ǁoa.

²¹ Tita ge Israelǁîn di ǃgoaxaǁaeb ǁîna tsūǃō-i tamas ka io tsūǃgâ-e ǃkhōǂgāba hâsa mû tama hâ. ǁÎn di ǃKhūb tsî Elob ge ǁîn ǀkha hâ; ǁîn ge ǁîb a ǁîn di gao-ao ǃkhaisa ra ǃkhō-am.

²² Elob ge ǁîna Egipteba xu ge ǂgaeǂguiǂui; ǁîb ge ǁîna ǃgarogomab khami gere ǃkhamba.

²³ ǀHôagao ǂhumi-i tamas ka io ǃgaidī-i xare-i ǀkhai, ǁnās ge Israelǁîn ǃoagu a sîsenūhe ǁkhā. Khoen ge nēsi Israelǁîn xa, ‘Kō tare-eb go Eloba dīsa!’ ti nî mî.

²⁴ Israelǁaes ge ǀgaisa xammi khami ī: ǁÎb ge ǀkhauǃā tsîb hapu tamas kōse sâ tama hâ; ǃgamhe go xū-i di ǀaobab ā tamas kōseb ge sâ tama hâ.”

²⁵ Ob ge Balaka Bileammi ǃoa ge mî: “Sats ge Israelǁîna ǀâxare ǂgao tama hâ, xawe tā ǁnâi ǁîna ǀkhae re!”

²⁶ Ob ge Bileamma ge ǃeream: “ǀNai ta kha mîba tsî tama hâ ǃKhūb ra mîba te xū-i ǀgui-e ta nî dī ǃkhaisa?”

Bileammi ǃnonaǁî kēbos

²⁷ Balaki ge ge mî: “Tita sao, î ta ǀnî ǃkhai-i ǁga ī-ū tsi. ǀNîsib khom Eloba ǁnāpa xu sats nî ǁîna ǀâxare ǃkhaisa nî mā-am tsio.”

²⁸ ǁNā-amagab ge Bileamma ū tsî Peorǃhommi ǃgaroǃhūb ǂamai ra ǃkhāǂuisenni ǂaob ai ge ūǃapa.

²⁹ Bileammi ge ǁîb ǃoa ge mî: “Hû altarde nēpa kuruba te, î hû ǁgōgu tsî baigu tsîga hā-ūba te.”

³⁰ Balaki ge mîbaheb ge khami dī tsî mâ altars hoas ai ǁgōb tsî baib tsîkha ge ǁguiba.