Numeri 1 - Khoekhoegowab 2020

ǂGuro ǃgôakhâihes Israelǁîn dis

¹ ǂGuro tsēs ǀgamǁî ǁkhâb, ǀgamǁî kurib dis Israelǁîn ge Egipteba xu ǂgaeǂguiǂuihes khaoǃgâb ge ǃKhūba Sinaiǃgaroǃhūb ǃnâ Moseb ǃoa ǃKhūb di Tentommi ǃnâ nēti ge mî:

² “Sats tsî Aron hâkho ge Israelǁîna ǁîn di ǃhaoǃnādi tsî ǀaokhoen ǃoa nî ǃgôakhâi. Hoaraga aorekhoegu

³ ǀgamdisi kurixa tsî ǁnās xa ǃnāsa kuriga ūhâgu, toroǃkhams ǃaroma a ǂhomisagu di ǀonde xoamâi.

⁴ Mâ ǃhaos hoasa xub ge ǀgui khoeb, ǃhaoǃnās di danaba nî hui kho.”

^5-16 Sao ra gu ge khoegu, nē sîsenni ǃaroma ge ǁhûihega: ǃHaos ǃHaoǃnās di danab Rubenni Sedeuri ôab, Elisuri Simeonni Surisadaib ôab, Selumieli Judab Aminadab ôab, Nasonni Isaskari Suari ôab, Netaneli Sebulonni Helonni ôab, Eliab Efraimmi Amihudi ôab, Elisamab Manaseb Pedasuri ôab, Gamalieli Benjaminni Gideonib ôab, Abidanni Danni Amisadaib ôab, Ahieseri Aseri Okranni ôab, Pagieli Gadi Deueli ôab, Eliasafi Naftalib Enanni ôab, Ahirab

ǃHaos ǃHaoǃnās di danab

¹⁷ Nē disiǀgamǀa khoegu di huib ǀkha kha ge Moseb tsî Aron hâkha,

¹⁸ hoaraga ǀhûhâsiba ǂguro tsēs ǀgamǁî ǁkhâb dis ai ǂgaiǀhao tsî khoena ǁîn di ǃhaoǃnādi tsî ǀaokhoen ǃoa ge xoamâi. Hoaraga aorekhoegu ǀgamdisi kurixa tsî ǁnās xa ǃnāsa kuriga ūhâgu ge ǃgôahe tsî

¹⁹ ǃKhūb ge mîmā khami ge xoamâihe. Nē xoamâis ge Moseb xa Sinaiǃgaroǃhūb ǃnâ ge dīhe.

^20-46 Aorekhoegu ǀgamdisi kurixa tsî ǁnās xa ǃnāsa kuriga ūhâgu, toroǃkhams ǃaroma a ǂhomisagu di ǀondi ge ǁîgu ǃhaoǃnādi tsî ǀaokhoen ǃoa ge xoamâihe. Nē xoamâis ge Jakob di ǂguro ǀgôab, Rubenni ǀkha ge tsoatsoa. Sao ra gu ge ǃhaodi di ǃgôaga: ǃHaos ǃGôas Rubenni hakadisiǃnaniǀaǀoadisi korokaidisi (46,500) Simeonni korodisikhoeseǀaǀoadisi ǃnonakaidisi (59,300) Gadi hakadisikoroǀaǀoadisi ǃnanikaidisikorodisi (45,650) Judab hûdisihakaǀaǀoadisi ǃnanikaidisi (74,600) Isaskari korodisihakaǀaǀoadisi hakakaidisi (54,400) Sebulonni korodisihûǀaǀoadisi hakakaidisi (57,400) Efraimmi hakadisiǀoadisi korokaidisi (40,500) Manaseb ǃnonadisiǀgamǀaǀoadisi ǀgamkaidisi (32,200) Benjaminni ǃnonadisikoroǀaǀoadisi hakakaidisi (35,400) Danni ǃnanidisiǀgamǀaǀoadisi hûkaidisi (62,700) Aseri hakadisiǀguiǀaǀoadisi korokaidisi (41,500) Naftalib korodisiǃnonaǀaǀoadisi hakakaidisi (53,400) ǀHaob ai ǃnanikaidisi tsî ǃnonaǀoadisi korokaidisi korodisi (603,550)

ǃHaos ǃGôas

⁴⁷ Leviǁîn ge nau ǃhaodi ǀkha ǀguipa ge xoamâihe tama hâ i,

⁴⁸ ǃKhūb ge Moseb ǃoa nēti mî xui-ao:

⁴⁹ “Toroǃkhams ǃaroma ǂhomisa khoegu ga xoakhâihe, o tā Leviǁîga ǁnāpa ǃgôaǂgā.

⁵⁰ Leviǁîga ǃKhūb di Tentommi tsî ǁîb ǃnâ hâ xūn hoan di ǃereamsa mā. ǁÎgu ge ǁîb tsî ǁîb ǃnâ hâ xūn tsîna tani, ǁîba kōǃgâ tsî hâǃkhaiba ǁîb ǂnamipe nî ǂnaumâi.

⁵¹ Doe du ga ǁaeb hoab ai gu ge Leviǁîga Tentomma ūǁnâ tsî ǁkhawa sao ra ǀasa hâǃkhaib ai sī nî ǂnaumâi. Tentommi ǀgūse ga hā khoe-i hoa-i ge nî ǃgamhe.

⁵² ǃGau ra ǃâb Israelǁîn dib ge ǁîn hâǃkhaiba ǃgubidi ǃnâ, mâ danakhoeb hoaba ǁîb ǃgubis tsî ǁîb di ǃkhaub ǃnaka nî ǂnaumâi.

⁵³ Xawe Leviǁîgu ge Tentomma gu nî ǃûise ǁîb ǂnamipe nî ǂnaumâi, î i tā khoe-i xare-e ǁîb ǀgūse hā, î ta tā ti ǁaib ǀkha Israelǁîna ǂkhôadī.”

⁵⁴ Israelǁîn ge ǃKhūb ge Moseba mîmā xūn hoana ge dī.